DILI, 03 marsu 2023 (TATOLI)–Vise Reitór trata asuntu estudantíl no garantia kualidade iha Universidade Nacional Timor Lorosa’e (UNTL), Samuel Venâncio de Sousa Freitas, hateten Estudante Finalista 2022 hosi UNTL hamutuk 1.380-resin sei simu graduasaun iha fulan-abríl tinan ida-ne’e.
Prosesu graduasaun ba estudante 1.380-resin hosi fakuldade sia-ne’e atraza, tanba ne’e Universidade deside adia prosesu graduasaun ne’e mai to’o 2023 ne’e.
“Ita termina no deside ona graduasaun ba tinan ida-ne’e sei realiza iha loron 11-12 abríl 2023, tanba ekipamentu ba graduasaun hanesan Toga, Tabu no Blanko iha ona maibé antes ne’e ita la bele garante tanba ekipamentu ne’ebé ita hameno ne’e laiha resposta,” nia hateten ba Agência Tatoli iha kampus UNTL, sesta ne’e.
Nia konsidera, graduasaun ne’ebé pendente ne’e halo ema barak liu-liu estudante barak mak la kontente, tanba loloos kalendáriu graduasaun ba estudante finalista 1.380-resin ne’e realiza iha fulan-dezembru 2022 maibé la akontese, depois muda fali mai fevereiru 2023 mós la konsege nafatin.
Nia promote, ba tinan ida ne’e Universidade bele garante ona tanba buat hotu preparadu ona, ne’eduni Universidade deside loron r11-12 abríl hodi hala’o graduasaun ne’e tanba númeru estudante finalista barak entaun tenke prepara ba loron rua atu asegura.
Tuir nia, totál númeru estudante finalista ne’ebé sei gradua iha abríl ne’e menus liu mak fakuldade ezata ne’ebé iha ninia estudante na’in-ida de’it maibé barak liu maka Fakuldade Edukasaun Arte no Umanidade ne’ebé kuaze 500-resin, no fakuldade sira seluk nia parte seidauk hatene númeru detallu ne’e hira.
Jornalista : Tomé Amado
Editór : Cancio Ximenes
