UNTL realiza inskrisaun ba estudante foun hahú iha 02-10 marsu
DILI, 28 fevereiru 2023 (TATOLI)–Vise Reitór trata asuntu akadémiku no garantia kualidade iha Universidade Nacional Timor Lorosa’e (UNTL), Samuel Venâncio de Sousa Freitas, hateten hahú hosi loron 03-10 marsu 2023 UNTL sei realiza prosesu inskrisaun ba estudante foun hamutuk na’in-4.421 ne’ebé admetidu ona mai UNTL.
Nia hatutan, UNTL liuhosi dirasaun jerál administrasaun akadémiku no dirasaun atendimentu estudante (DNAE) husu ona ba estudante foun tinan akadémiku 2023 ne’ebé naran públika ona iha website Ministériu Ensinu Superior Siénsia no Kultura (MESSK) nian, atu bele mai halo inskrisaun tuir data ne’ebé termina ona.
“Loron ne’ebé atu halo inskrisaun mak hahú hosi 03 to’o 10 marsu 2023 ne’ebé hahú loke dadeer tuku 08h45 to’o 11h45, depois hosi tempu lorokraik hahú hosi 14h00 to’o 16h50. Iha biban ida ne’e mós dirasaun nasionál pagamentu no propina hakarak informa ba estudante ne’ebé atu mai halo inskrisaun iha UNTL tenke lori ho dokumentu sira mak hanesan naran kompletu ne’ebé fó sai hosi MESSK ka públika ona iha website UNTL nian,” nia hateten ba Agência Tatoli, iha kampus UNTL, sesta ne’e.
Informasaun ida-ne’e informa mós hosi Dirasaun Nasionál Pagamentu ba Propina katak iha inskrisaun nia laran kada estudante sira sei selu propina ho montante $83 ne’ebé kategoria ba osan edifísiu $20, osan ba almamater $28, osan ba orientasaun akadémiku $5 no osan ba propina $30.
Ministériu Ensinu Superiór Siénsia no Kultura (MESSK) liuhosi Komisaun Asesu Engeresu Ensinu Superior (KAEES) mós fó oportunidade loron lima ba estudante ne’ebé la pasa iha selesaun ne’e, atu hatama sira-nia reklamasaun maibé manda ba KAEES la’ós mai UNTL.
“Reklamasaun ne’ebé KAEES fó ba estudante sira-ne’ebé la pasa ne’e karik iha buat ruma mak laloos KAEES bele halo fila-fali verifikasaun depois bele relata fali,” nia dehan.
Prosesu ba estudante foun sira-ne’e konsidera tarde liu ona tanba loloos agora daudaun ne’e aula ba estudante foun sira hahú tiha ona maibé tanba iha fallansu buat balun halo prosesu inskrisaun ne’e adia to’o fulan marsu ne’e mak foin loke prosesu inskrisaun, maibé haree ba desizaun oráriu ne’ebé termina ona bele fó biban atu aselera lalais prosesu ne’e.
Entretantu, ba loron 03 no 04 marsu 2023 ne’e UNTL sei distribui de’it formuláriu ba estudante foun sira atu sira bele halo matrikula hodi hetan númeru rejistu estudante (NRE) depois mak loron tuir mai foin halo inskrisaun.
Nia dehan, prosesu pagamentu bele tarde maibé prosesu matrikula mak tenke la’o tuir kalendáriu ne’ebé fó sai ona atu universidade bele rejista totál estudante na’in hira mak halo ona matrikula.
Ba estudante foun sira atu halo inskrisaun ne’e tenke aprezenta númeru loloos no naran tenke kompletu tuir naran ne’ebé fó sai ona iha website MESSK no UNTL nian.
Estudante hirak ne’e tenke prienxe formuláriu ne’ebé prepara ona hosi dirasaun nasionál atendimentu estudante no diresaun nasionál pagamentu no propina, fotokopia diploma no deklarasaun hosi eskola, fotokopia sertidaun RDTL ka Batizmu no mós fotokopia kartaun ezame nasionál inklui formuláriu teste.
Jornalista : Tomé Amado
Editór : Cancio Ximenes
