DILI, 04 marsu 2023 (TATOLI)–Avansadu prinsipál na’in-rua hosi klube primeira divizaun Liga Futeból Timor-Leste (LFTL) ho naran istimadu AD SLB alias Makikit Laulara, Zenivio Mota no Mouzinho de Lima, hatama golu rua ba adversariu Emmanuel FC hodi halo terus ekipa ne’e labele gaña pontu tolu.
Vitoria SLB nian ne’e iha jogu kontinuasaun LFTL ne’ebé hala’o iha Estádiu Munisipál Dili sábadu lorohaik ne’e.
Hanesan baibain jogu hahú ekipa rua lansa kedan kontra no atake ba malu liuhosi tékniku no abilidade ekipa ida-idak nian tuir orientasaun treinadór sira-nian.
Ekipa SLB utiliza duni orientasaun hirak ne’e ho di’ak, nune’e iha minutu primeiru domina kedan bola halo barullu iha lina oin Emmanuel nian, jogadór Michel Hutabarat (26) lansa xutu ida ba rede Emmanuel maibé la kona iha alvu.
Maski nune’e, Emmanuel hadau hikas bola halo jogu ho modelu ofensivu maibé SLB tenta hamate jogu ne’ebé mak Emmanuel lansa bola monu hikas ba SLB nia liman, avansadu Mouzinho de Lima tenta utiliza jogu individu maibé sei satan makaas hosi defeza Emmanuel nian.
Maske esforsu hirak ne’e seidauk fó susesu ba SLB jogadór sira solidu nafatin iha kampu laran be nahe aan ho duut matak be mamar hodi hala’o jogu no iha nafatin esperansa katak sei hatama duni golu ida-ne’e mak objetivu primeiru.
Jogadór parte rua hala’o jogu ne’ebé hetan apoiu makaas hosi adeptu Emmanuel no SLB nian ne’ebé tur nahe aan iha tribun leten Estádiu nian hakilar ho lian makaas halo Estádiu ne’e nakdoko.
Jogu la’o to’o ona minutu 23, sorte di’ak monu ona ba ekipa identiku Makikit Laularan tanba jogadór sira komesa lori bola iha lina oin Emmanuel nian, jogadór Zenivio lansa kedan xutu ho kalma ida ba rede Emmanuel halo guarda rede Fortonato Gomes la antesipa ho di’ak, bola tama liu ba rede hodi muda skor ba 1-0.
Hosi golu ne’e halo tensaun jogu sa’e makaas liután tanba jogadór Emmanuel hakarak halo empata jogu ne’e, avansadu Edit Savio no Mario Mbape lansa kontra no atake makaas maibé kontra no atake hirak ne’e hela de’it ho naran tanba la fó rezultadu.
Liu de’it minutu hira, iha minutu 28, tanba jogu nia velosidade sa’e makaas, jogadór Zenivio Mota la kontrola nia emosaun kria erru iha jogu laran no árbitru deside fó kartaun-mean ba jogadór ne’e hodi haruka sai mai li’ur, signifika laiha ona direitu absoluta halo jogu iha kampu laran.
Maske ekipa SLB mantein de’it ho jogadór na’in 10 iha kampu laran, maibé ekipa ne’e nafatin solidu hodi la fó biban ba armada Emmanuel atu halo golu to’o minutu termina rezultadu hela ho 1-0.
Tama ba segunda parte, ekipa rua nafatin lansa kontra no atake ba malu hanesan minutu primeira parte, Emmanuel komesa domina makaas bola maibé la konsege ultrapasa defeza SLB hanesan hela moru berlin dudu la ba no tebe la monu.
SLB ladún domina ona bola no hahú hatudu jogu ne’ebé kalma no la ansi halo golu bainhira seidauk iha oportunidade.
Maske joga ho kalma la hela de’it ho kalma fó duni rezultadu pozitivu tanba iha menutu 72, jogadór Mouzinho de Lima hetan oportunidade halo jogu individu hosi kampu klaran too lina oin Emmanuel nian lansa xutu ida ba rede Emmanuel konsege tama liu ba rede laran hodi hametin kedan rezultadu ba skor 2-0.
Golu ne’e mak golu ikus ba ekipa rua tanba to’o minutu 90 termina, laiha tan golu ruma mak akontese.
Maibé, sorte aa tba SLB, tanba nia jogadór defeza Gumario Morreira iha minutu 90 halo erru makaas hasoru árbitru no laiha kedan salvasaun no obrigadu tenke simu kartaun-mean hodi sai hosi kampu laran.
Ho nune’e, SLB tenke joga de’it ho jogadór na’in-sia maibé fó duni prova vitoria hela ho SLB ho pontu tolu enkuantu Emmanuel hela ho derrota.
Eskuad Emmanuel:
FORTUNATO GOMES (77), AMANCIO ARAUJO (18), CRISTOVÃO DE CARVALHO (29), JUVITO MONIZ (3), JOÃO DE SOUSA (22), ZINEDINE LOPES (6), LUIS GUSMÃO (17), ZEFERINHO NHEU (12), SANDRO QUINTÃO (14), MARIO QUINTÃO (11), EDIT SAVIO (10).
Suplente:
CARVARINHO FERNANDES (1), AFONSO DE CARVALHO (2), CARLOS SOARES (23), ELROY BRAZ (15), JONATAS PEREIRA (7), NILTON DE CARVALHO (25), ORLANDO BELO (21), VIDAL CORREIA (5), VIVALDO MAGNO (13), ANGELITO TILMAN (8), BERNARDINO DE SENA (4).
Treainadór: Emilio Ribeiro
Eskuad SLB:
ANDREW MENSAH (13), BAKAYOKO OZI (2), MICHEL HUTABARAT (26), JHON FRITH DE OLIVEIRA (6), CRISTOVÃO FERNANDES (23), FILIPE OLIVEIRA (24), GUMARIO MOREIRA (5), JEREMIAS BAPTISTA (69), KORNELIS PORTELA (11), ZENIVIO MOTA (7), MOUZINHO DE LIMA (10).
Suplente:
FILONITO NOGUEIRA (12), TOMAS SARMENTO (4), ALEXANDRO KEFI (21), NATALINO DA COSTA (8), FERNANDO DE CARVALHO (3), NIDIO ALVES (93), ALDO AMARAL (19), DOMINGOS RIBEIRO (22), ALEXANDRO LEMOS (9), NORBERT GONCALVES (14), VABIO PIRES (28).
Treinadór: Julião Monteiro
Jogu ne’e dirije hosi árbitru Pedro Braga, juiz liña Antonio de Cravalho, Fernando do Rego no árbitru rezerva Pedro Carvalho.
Jornalista : Hortencio Sanchez
Editór : Cancio Ximenes
