DILI,06 marsu 2023 (TATOLI) – Médiku Espesialista Kardiolojia iha Hospitál Nasionál Guido Valadares (HNGV) Herculano Seixas, relata dezde 2016 pasiente moras rematizmu fuan ne’ebé halo tratamentu HNGV hamutuk 480 no na’in-hitu mak lakon vida.
“Husi dadus 2016 mai to’o agora, pasiente ne’ebé mak halo tratamentu iha opsitál referál no Ospitál Nasionál Guido Valadares hamutuk 480, husi ne’e na’in-hitu mak mate tanba kazu komplikasaun no maoiria idade 20 mai kraik”, Herculano Seixas dehan bainhira partisipia iha simpóziu moras rematizmu fuan iha Hotel Timor, ohin.
Herculano dehan, kazu rematizmu fuan ne’e maioria mai husi Dili, Ermera no Bobonaro tanba moras rematismu fuan bainhira mosu mai husi falta ijiene liuliu infesaun kulit hodi halo transmite husi bateria estreptokósikas.
“Infesaun seluk mak iha kakorok, ibun laran, nehan, bahinhira la halo taratmentu di’ak bele sai fontes hodi provoka rematismu fuan”, nia afirma.
Nia hateten, bainhira halo prevensaun ba moras rematizmu fuan hanesan kose nehan, haris halo moos, ida ne’e tenke ijene pesoál atu labele hetan moras ida ne’e.
Iha fatin hanesan, Diretora Jerál Prestasaun Saúde, Odete da Silva Viegas, informa moras rematismu fuan sai preokupasaun bo’ot ba labarik no joven sira iha Timor-Leste.
“Moras rematizmu fuan sai preokupsaun bo’ot hodi afeta ba ita-nia oan no mós ba ita nia joven sira iha rai-laran, se bainhira mak ita la halo prevensaun mak sei hamosu komplikasaun ba moras ida ne’e”, Odete esplika.
Moras rematizmu fuan sai mos asuntu importante iha MS liuhosi Diresaun Nasionál Kontrolu Moras ne’ebé mak durante servisu hamutuk ho East Timor Hearts Fund, Menzies, São João Of God, Maluk Timor no mós Instituto Nasionál Saúde ba kapasitasaun rekursu umanus no HNGV mak sai fatin ne’ebé mak atende moras sira.
“Bainhira ita deteta labarik sira ne’ebé mak ho moras rematizmu fuan ita la konsgue trata iha ne’e mak ita haruka ona labarik na’in-10 ba halo tratamentu rematizmu fuan iha Ospitál Royal Darwin Australia”, nia konklui.
Jornalista : Felicidade Ximenes
Editór : Zezito Silva
