UNICEF-EUA entrega laptop haat no tablet 42 ba MEJD
DILI, 06 marsu 2023 (TATOLI)–Parseiru dezenvolvimentu UNICEF no Embaixada Estadu Unidu Amérika entrega laptop haat no tablet 42 ba Ministériu Edukasaun Juventude no Desportu (MEJD) hodi fó apoiu ba sentru aprendizajen Komunitária (SKA) haat iha Dili, Baucau no Manatuto.
Ministru Edukasaun Juventude no Desportu, Armindo Maia, hateten ekipamentu eletróniku ne’ebé oferese hosi UNICEF mai MEJD atu kontinua fornese ba SKA haat ne’e ninia fundu mai hosi Embaixada Estadu Unidu Amérika ho montante rihun $10.
“Ohin, loron ida importante tebes ba profesór no estudante sira iha sentru aprendizajen komunitária haat mak iha Dili (Kristu Rei kreatíva no Moravida Maskál) BauCau Kreativa inklui Manatuto (Futuru Rantau), tanba bele sai ona benefisiáriu ba apoiu ekipamentu eletróniku ne’ebé fornese hosi parseiru dezenvolvimentu UNICEF hamutuk ho Embaixada Estadu Unidu Amérika (EUA) iha Timor-Leste,” Ministru Armindo Maia hateten iha ninia diskursu ne’ebé hato’o iha salaun enkontru MEJD, Vila Verde, segunda ne’e.
Sentru aprendizajen haat ne’ebé hetan ona ekipamentu eletróniku inklui laptop haat no tablet 42 ne’e hodi tulun estudante sira iha prosesu formasaun no edukasaun, tanba sentru haat ne’e konsege apoiu ona formasaun iha área sia (9) ne’ebé foka liu ba siénsia no teknolojia, enjeñaria arte inklui Matemátika.
Projetu apoiu ekipamentu eletróniku ba sentru haat ne’e konsidera hanesan pilotajen ida no tuir planu sei espande tan ba sentru sira seluk.
Nia fiar katak programa ne’ebé mak implementa ona liuhosi kooperasaun ho UNICEF no CRC sei fó benefísiu ida di’ak tebes hodi haforsa liután prosesu ensinu aprendizajen iha sentru haat ne’e.
“Ha’u konsidera katak liuhosi ekipamentu eletrónika sira-ne’ebé mak ohin ita simu hosi parseiru dezenvolvimentu sira-ne’ebé bele ajuda liután ita-nia estudante sira atu ajuda explora dezenvolve hodi hadi’a liután sira-nia potensialidade hodi nune’e bele lori ita-nia estudante sira-ne’e sai ajente transformasaun iha família komunidade no mós sosiedade nia laran,” nia dehan.
Ho nune’e, lori VIII Governu Konstitusionál nia naran liuhosi Ministériu Edukasaun hato’o agradesimentu ba UNICEF tanba hatudu ona ninia kna’ar ida-ne’ebé ho tempu naruk bele fó ona apoiu ba kursu sira-ne’ebé produtivu inklui ekipamentu la haluha mós agradese ba Estadu Unidu Amérika ho sira-nia kontribuisaun boot bele kontribui ona materiál sira hodi tulun prosesu ensinu aprendizajen ba estudante sira.
Reprezentante UNICEF iha Timor-Leste, Bilal Durrani, hateten iha tinan 2020 UNICEF Timor-Leste asina ona akordu parseria rua hodi apoiu Ministériu Edukasaun Juventude no Desportu buka atu dezenvolve kursu aprendizajen online ba adolsente no foinsa’e timoroan sira.
UNICEF halo ona parseria ho Massachusetts Institute of Technology (MIT) hodi dezenvolve kursu sira iha área Siénsia, Teknolojia, Enjeñaria, Arte, no Matemátika ne’ebé koñesidu hanesan kursu STEAM sira.
UNICEF halo ona parseria ho INSPER University iha Brazil hodi dezenvolve Kursu Literasia Finanseira, kursu sira-ne’e foka liu ba “C4” hosi abilidade sékulu 21 komunikasaun, kolaborasaun, Pensamentu Krítiku, no kreatividade.
Kursu sira-ne’e dezenvolve hodi oferese oportunidade aprendizajen online relevante sira ho kualidade aas bazeada ba projetu sira atu insentiva adolesente no foinsa’e sira iha Timor-Leste atu iha kreatividade, inovadór, krítiku no prontu ba empregabilidade.
Kursu sira ne’e uza abordajen inovadora no involve apoiu hosi ekipa foinsa’e timoroan ho idade 17-23 ne’ebé atua hanesan ko-kriadór hodi garante kursu sira-ne’ebé relevante no atrativu ba foinsa’e timoroan.
Alende ne’e, tuir abordajen ida hosi foinsa’e ba foinsa’e, signifika foinsa’e sira rasik mak aprezenta konteúdu no atividade sira liuhosi produsaun video hanesan parte hosi kursu sira.
Iha tinan kotuk, UNICEF asina ona akordu parseria ho Embaixada Estadu Unidu Amérika (USA) iha Timor-Leste hodi halo pilotajen ba Sentru Aprendizajen Komunitária (ALC) haat (4), ba kursu STEAM sira iha Sentru Aprendizajen Komunitária sira iha Dili (Cristu Rei ho Mora Vida Maskal), ida iha Baucau (Baucau Kreativu), no ida iha Manatuto (Futuru Rentau).
Durante pilotajen ne’e, adolesente hamutuk na’in-60 ho idade tinan 17-33 partisipa ona iha programa ne’e. inklui feto 27 no mane 33.
“Ami deskobre katak partisipante sira iha preferénsia atu kompleta kursu sira mak aplika direta ho pratika iha sira-nia moris loro-loron. Kursu sira hanesan halo pensu sira mak bele uza fila-fali, fase liman, edukasaun finanseira, no halo jardín vertikál sira mak populár liu fali kursu sira seluk hanesan ezemplu asedifikasaun tasi,” nia dehan.
Jornalista : Tomé Amado
Editór : Cancio Ximenes
