AS Marca manán Kablaki ho golu mihis
DILI, 07 marsu 2023 (TATOLI) – Klube segunda divizaun Liga Futeból Timor-Leste (LFTL) AS Marca FC susesu iha nia jornada hodi halakon adversáriu Kablaki FC ho golu mihis ka 2-1 iha jogu kontinuasaun ne’ebé hala’o iha Estádiu Munisipál Dili, tersa loraik ne’e.
Hanesan baibain menutu primeiru hahú ekipa rua lansa kedan kontra no atake ba malu tuir tékniku no abilidade idaidak nian atu buka hatama golu tuir orientasaun treinadór sira nian.
Ekipa rua halo jogu brillante tanba hetan apoiu másimu hosi adeptu parte rua nian ne’ebé tur haleu tribun Estádiu nian hakilar fó kontente tebes ba jogadór sira atu iha esperansa makas atu halo netik buat ruma durante jogu.
Jogadór sira halo kontra atake ne’ebé makas ba malu maibé Marca domina bola tanba halo jogu ofensivu no mós defensivu bainhira armada Kablaki halo kontra atake makas.
Maibé esforsu Marca nian la hela de’it hanesan esforsu tanba iha menutu 15 jogadór Carol Nacimentu (21) hetan oportunidade di’ak lansa suta ba rede Kablaki halo guarda rede Januario Abay (1) la antisipa rede konsege nakdoko muda rezultadu ba 1-0.
Depois golu ekipa Kablaki la nonok tenta halo kontra no atake makas maibé suta hirak ne’ebé avansadu sira halo nunka kona iha alvu no oportunidade balu defeza Marca tenta hamate.
La’os Kablaki de’it mak halo jogu másimu maibé Marca mós iha ambisaun makas atu halo tan golu maibé laiha ona oportunidade ho nune’e menutu 45 termina laiha tan golu ruma mak akontese ekipa rua tenke termina ho vitória provizória ba Marca lidera 1-0.
Iha segunda parte, ekipa rua nafatin lansa kontra no atake ba malu ho velosidade ne’ebé makas liu, Marca halo jogu ho kalma la ansi hatama golu bainhira seidauk hetan oportunidade tanba sira lidera provizóriu ona ho golu ida, Kablaki iha ambisaun makas atu halo golu nune’e bele muda rezultadu ba empata, ho nune’e iha menutu 49 jogadór Kablaki Dionisio da Costa (17) hetan oportunidade lori bola livre ba liña oin Marca nian defeza Marca tenta salva bola maibé komete ho erru hasoru jogadór ne’e árbitru deside fó penalidade ba Kablaki.
Hosi penalidade ne’e Kablaki hanoin ona atu halo empata jogu ne’e, halo treinadór Carlos Vilar tur la hakmatek halai ba mai orienta jogadór sira oinsa bele ezekuta halo didi’ak nune’e bele golu.
Teki-teki jogadór Julvito Nacimentu (9) mak hetan oportunidade hodi ezekuta penalidade bainhira árbitru hu arbitu. Bainhira hu, jogadór ne’e lansa suta bola semo sa’e liu ba liur no latama ba rede laran halo jogadór hotu triste no oin nakraik no Marca kontente no halai ba mai iha kampu laran.
Jogu kontinua la’o Kablaki la lakon esperansa tanba nafatin mantein iha pozisaun halo jogu ho ansiozu atu halo golu ruma, esperansa ne’ebé Kablaki iha la hela de’it hanesan esperansa tanba iha menutu 73 jogadór Alito da Cruz (22) lansa sutu ida bainhira bola barullu iha lina oin Marca nian bola tama liu ba rede laran rezultadu konsege muda duni ba 1-1.
Ho rezultadu ne’e halo jogu ba ekipa rua manas liután maibé sorte aat ba Kablaki tanba iha menutu 77 defeza Kablaki halo falta hasoru avansadu Marca Ezaquel da Cruz (11) iha liña oin Kablaki nian árbitru deside kedan penalidade.
Penalidede ne’e ezekuta hosi jogadór Oktavianus Gonçalves (24) lansa suta ho kalma ba rede Kablaki halo guarda rede hamrik hateke de’it bola tama liu ba laran rezultadu nakfilak kedan ba 2-1.
Rezultadu ne’e hanesan ikus ba ekipa rua tanba to’o menutu 90 termina laiha tan golu ruma mak akontese ba ekipa rua no vitoria hela ba Marca no Kablaki hela ho derrota.
Eskuad Marca:
Yohanes Kalau (1), Natanael Barros (16), Izaquel Moniz (94), Carol Waitila (4), Frabrizio dos Santos (3), Janiel Fernandes (33), David Mendonça (12), Filomeno Mucasana (28), Carol Nacimento (21), Ezaquel da Cruz (11), Oktavianus Gonçalves (24).
Suplente:
Alexandre Quintão (30), João dos Reis (66), Duarte do Rego (8), Ronal Gusmão (23), Marcio da Costa (13), Rosario da Cruz (6), Jeronimo Freitas (10), Teofilo Barros (9), Ivan José (22) Dalendinho de Jesus (99), Armando Leite (5).
Treinadór: Octavio da Costa
Eskuad Kablaki:
Januario Abay (1), Acoli Maia (5), Armindo Quintão (2), Martinho Vaz (19), Elidio Manuel (10), Rui Gusmão (15), Nelson Antonio (16), Moises Ximenes (14), Dionisio da Costa (17), Julvito Nacimento (9), Ronaldo Fernandes (21).
Suplente:
Calistro Pinto (20), Martinho da Costa (3), Lexander Monis (13), Tito dos Santos (18), Silvestre Castro (4), João Vitctor (8), Alito da Cruz (22), Julião Santos (7).
Treinadór: Carlos Vilar
Jogu ne’e dirije hosi árbitru Joanico Gama, juiz liña Ricardo Amaral, Silvano Vieira no árbitru rezerva Cardido Carvalho.
Jornalista: Hortencio Sanchez
Editór : Zezito Silva
