Japaun apoiu orsamentu konstrui eskola rua no sentru formasaun AHMDTL
DILI, 07 marsu 2023 (TATOLI) – Governu Japaun liuhosi Embaxada iha Timor-Leste apoia orsamentu hamutuk $332,865.00 hodi harii eskola rua no sentru formasaun ida ba Asosiasaun Halibur Defisiente Matan Timor-Leste (AHMDTL) iha munisípiu tolu.
“Parabéns ba organizasaun sira ne’ebé hetan apoiu hodi harii eskola ida Ensinu Báziku Sentrál Katolika (EBCC-sigla portugés) Nosa Señora Aitara iha Manatutu Suku Manlala, oferese mobiliáriu ba eskola Jardin Infantíl iha Suku Haturalan Manatuto no harí edifísiu eskola primaria ida iha Suku Cocoa Railaco Munisípiu Ermera”, Embaxadór Japaun, Tetsuya Kimura dehan iha ámbitu asina akordu ho Governu Timor-Leste kona-ba projetu haat ne’e Embaxada Japaun, ohin.
Embaixadór fiar katak projetu hirak ne’e sei la’o ho susesu no nia rasik mak sei halo inagurasaun hamutuk ho Governu Timor-Leste.
“Ha’u hein atu vizita fatin projetu sira hotu bainhira halo inagurasaun, ha’u fiar sei hasoru fali imi hotu iha fatin projetu nian”, embaxadór adianta.
Aleinde ne’e, nia husu ba autoridade lokál, komunidade hotu ne’ebé sai responsável ba projetu ne’e atu asume kna’ar sira ho responsabilidade. tenke fó atensaun másima ba manutensaun ne’ebé di’ak atu kuidadu fasilidade servisu nian. Obra ne’e sei halo iha tempu badak.
“Ha’u nia dezeju, ita-nia projetu sira sei la’o ho di’ak, prosperiedade ba Timor-Leste no moris haksolok ba ita hotu”, nia hakotu.
Iha okaziaun ne’e, Ministru Edukasaun Juventude no Desportu (MEJD) Armindo Maia, agradese ba Governu no povu japaun nia apoiu ba povu Timor-Leste ne’ebé dezde iha 2002 liubá.
“Apoiu ne’ebé Governu Japaun fó la’os ne’e de’it, dezde uluk kedan, ha’u sei Ministru Edukasaun. Japaun fó ona nia apoiu mai ita liuliu iha área edukasaun, hadia infraestrutura, eskola barak mak Governu Japaun halo iha Timor-Leste to’o ohin loron ita-nia oan sira sei utiliza hela ba prosesu aprendizajen”, ministru rekorda.
Tanba ne’e, ministru husu empreza sira ne’ebé sei kaer projetu ho responsabilidade atu bele hatudu rezultadu di’ak.
Iha sorin seluk, Vise Ministra Solidaridade Sosiál no Inkluzaun (MSSI) Signi Sandrawati Verdial, agradese ba Governu no Povu Japaun ne’ebé laran luak apoia ona orsamentu hodi harii sentru formasaun ba ema ho defisiensia matan sira.
“Agradese tebes ba Governu no Povu Japaun ne’ebé apoiu ona ba ita-nia maluk ho defisiente matan sira, Governu nunka husik ema defisiente sira iha kotuk, Governu sempre trata ema hotu hanesan”, governante dehan.
Rekorda fali katak durante Japaun nia apoiu mai Timor-Leste iha área edukasaun liuliu infrastrutura nian konsege harii ona eskola barak hanesan halo konstrusaun ba fakuldade Enjinária Universidade Nasionál Timor Loros’e (UNTL) no seluk tan.
Japaun mós prepara hela atu halo konstrusaun ba edifísi Aeroportu Prezidente Nicolau Lobato ne’ebé sei hala’o iha tempu besik.
Aleinde ne’e, Japaun mós apoiu iha área agrikultura nian, oferese mós bolsu estudu ba timoroan liu 2000 mak ba hala’o ona estudu iha Japaun, hosi númeru ne’e balun hasai ona doutoramentu, mestradu no lisensiatura.
Ba oin, Japaun hakarak kontinua apoiu Timor-Leste iha área saida de’it mak Timor-Leste presiza atu dudu lalais dezenvolvimentu Timor-Leste nian.
Jornalista: Hortencio Sanchez
Editór : Zezito Silva
