MEJD sei halo pagamentu retroativu ba professor 90-resin iha tinan ida-ne’e
DILI, 07 marsu 2023 (TATOLI)–Diretór Jerál Administrasaun no Jestaun Finansa iha Ministériu Edukasaun Juventude no Desportu (MEJD), Antoninho Pires, hateten iha tinan ne’e MEJD sei halo pagamentu retroativu ba profesór 90-resin ne’ebé seidauk hetan sira-nia direitu.
Nia hatutan, totál dadus profesór ne’ebé hetan direitu ba pagamentu retroativu ne’e hamutuk 2.500 ne’ebé Ministériu Edukasaun Juventude no Desportu liuhosi Dirasaun Nasionál Rekursu Umanu halo dezde tinan kotuk kedan.
“Ami prosesu ona direitu profesór sira-ne’ebé atu hetan retorativu ne’e hahú kedan iha tinan kotuk hosi profesór 2.000-resin, ne’ebé ita prosesa sira-nia retroativu ne’e kuaze na’in-1.800-resin mak hetan ona pagamentu,” Antoninho Pires hateten ba ba jornalista sira iha salaun Enkontru MEJD, Vila Verde.
Nia dehan, hosi metade profesór ne’ebé hetan ona pagamentu retroativu ne’e bele konsidera katak númeru ba retroativu nian menus ona, tanba hosi segundu informasaun ne’ebé nia asesu katak la to’o ona 100 entaun bele dehan falta de’it ona 90-resin.
Prosesu ne’ebé sira hahú kedan hosi tinan kotuk mai to’o ohin loron ne’e konsidera katak pagamentu mós hahú la’o ona, nune’e pagamentu retroativu ba profesór sira-ne’e mak konklui ona bele konsidera katak diretu ba profesór sira-nian durante ne’e bele rezolve ona.
Entretantu, liuhosi esforsu ne’ebé Ministériu Edukasaun halo iha mandatu VIII Governu konstitusionál ne’e atu hakarak atu lori edukasaun ida di’akliu, hodi nune’e molok mandatu ramata ema hotu ne’ebé mak dedika sira-nia-an ba dezenvolvimentu edukasaun iha Timor-Leste ne’e.
Jornalista : Tomé Amado
Editór : Cancio Ximenes
