NASIONÁL, EDUKASAUN, DILI, HEADLINE

Prezidente KFP husu jerasaun foun estuda makaas tuir área kompeténsia

Prezidente KFP husu jerasaun foun estuda makaas tuir área kompeténsia

Prezidente Komisaun Funsaun Públika, Faustino Cardoso. Imajen Tatoli/Francisco Sony

DILI, 07 marsu 2023 (TATOLI)–Prezidente Komisaun Funsaun Públika (KFP), Faustino Cardoso, husu ba jerasaun foinsa’e sira iha nasaun ne’e atu hakaas-an estuda makaas tuir área kompeténsia sira hodi prepara an sai rekursu ida ne’ebé iha kapasidade no kualidade atu hatán ba merkadu traballu iha futuru.

“Ha’u husu ba jerasaun foun sira tenke hatudu vontade forte hodi kontinua estudu tuir área kompeténsia sira-ne’e mak ita-nia estadu presiza hodi hakle’an liután matenek no aproveita evolusaun kona-ba avansa teknolojia no informátika sira-ne’ebé oras ne’e daudaun akontese iha mundu. Tanba ita-nia rekursu umanu bainhira laiha kapasidade no koñesimentu kona-ba informátika ita bele kontinua hela nafatin iha kotuk,” Prezidente KFP ne’e hateten ba Agência Tatoli iha Sentru Konvensaun, foin lalais ne’e.

Nia hateten hosi era dijitalizasaun informátika ne’ebé ohin loron akontese iha mundu ne’e ezije kapasidade ema nian liu-liu jerasaun foinsa’e sira nian oinsá atu ajusta-an no investe an liuhosi koñesimentu sira-ne’ebé ligadu ho informátika.

Nia dehan, la interrese ema-ne’e atu servisu ka la servisu maibé hanesan jerasaun foun Timor nia oan tenke hatudu ninia vontade, bainhira hakarak moris tenke hatene situasaun ida-ne’e atu nune’e bele fó kontribuisaun másimu ba interrese dezenvolvimentu nasaun no pesoál mós.

Tanba, ohin loron bainhira ko’alia kona-ba rekursu umanu ida ideál ne’e tenke iha kapasidade intelektuál akadémika tenke hatene analiza no buka akompaña situasaun depois bele hamosu solusaun ho nune’e mak ajusta tan ho vontade nasionalizmu no patriotizmu atu bele hametin liután timoroan ida-ne’e forte.

Maibé kuandu rekursu umanu ida ideál ne’ebé kabe ba jerasaun iha kontestu Timor nian ne’e mak la atualiza ho didi’ak hodi akompaña dezenvolvimentu ne’ebé la’o iha rejionál no mundiál, rekursu umanu ne’e bele lakon tiha ninia atualizasaun no kbiit atu bele partisipa iha prosesu dezenvolvimentu sira.

Jornalista : Tomé Amado

Editór       : Cancio Ximenes

iklan
iklan

Leave a Reply

iklan
error: Content is protected !!