Halo “terus” Nagardjo ho golu haat, DIT provizóriu lidera tabela klasifikasaun

DILI, 08 marsu 2023 (TATOLI) – Ekipa hosi Universidade Dili Institute of Technology (DIT) ho naran estimadu DIT FC susesu iha nia jornada hodi halo terus adversáriu Nagardjo FC ho golu haat no hakat kedan ba tur iha liña primeiru tabela klasifikasaun provizóriu ho pontu neen.

Vitória ne’ebé DIT hetan iha jogu kontinuasaun segunda divizaun Liga Futeból Timor-Leste (LFTL) ne’ebé hala’o iha Estádiu Munisipál Dili, kuarta loraik ne’e.

Hanesan baibain ekipa sira hahú jogu identiku ona ho lansa kontra no atake ba malu tuir tékniku no abilidade ida-idak nian atu buka hatama golu nune’e bele fó vitória ba ekipa.

DIT joga ho kalma no la ansi halo kontra no atake ne’ebé makas bainhira seidauk hetan oportunidade atu halo golu, enkuantu Nagardjo halo jogu ho ambisaun ne’ebé makas atu buka hatama golu lais.

Ho ambisaun ne’ebé Nagardjo halo hela de’it hanesan ambisaun tanba la hatudu rezultadu golu ruma tanba avansadu la ezekuta oportunidade sira ho di’ak DIT tenta hamate tutuir Nagardjo nia jogu.

Jogu la’o másimu tebes DIT hetan ona frakeza Nagardjo nian sira komesa lansa kontra no atake ne’ebé makas iha menutu 27 jogadór Serafim Brito (17) lansa sutu ida ba rede Nagardjo halo guarda rede Sandy Kurnia (12) la konsege salva no bola tama liu ba rede laran rezultadu muda ba 1-0.

Ho golu ne’ebé iha halo DIT nia jogadór sira iha kampu laran loke liras liután hatudu jogu ne’ebé brillante atu bele halo tan golu ruma.

Jogadór Nagardjo mós la nonok de’it tenta halo jogu ho másimu maibé jogadór DIT tenta hamate tutuir sira nia jogu ikus la rezulta golu sira tenke sofre liu tan iha kampo laran.

Armada DIT ne’ebé lidera hosi treinadór Mial Armad kontinua obriga jogadór sira atu hasa’e liutan velosidade jogu nune’e bele aumenta tan golu.

Orientasaun ne’e la hela de’it ho naran tanba iha menutu 34 jogadór Elvis Silva (9) lansa tan golu id aba rede Nagardjo muda kedan rezultadu ba 2-0.

Golu ne’e mak hanesan golu ikus iha menutu 45 da-huluk tanba to’o menutu termina laiha tan golu ruma vitória provizóriu hela ba DIT.

Haksoit ba segunda parte ekipa rua kontinua hatudu jogu ne’ebé di’ak hodi fó ksolok ba adeptus sira ne’ebé tur iha tribun leten Estádiu hakilar makas fó suporta ne’ebé másimu tebes.

Nagadjo kontinua esforsu aan atu halo golu hodi muda rezultadu sei oinseluk maibé la konsege nafatin tanba laiha avansadu ne’ebé di’ak ikus mai jogu Nagardjo nian mantein hanesan prmeira parte.

DIT maske manán ona ho 2-0 maibé nafatin esforsu hodi halo golu tan tanba seidauk satisfaz ho golu rua ne’ebé iha ona.

Esforsu hirak DIT halo fó duni vantajen di’ak ba ekipa tanba iha mentu 76 jogadór Xavier Sila (29) lansa tan golu ida muda rezultadu ba 3-0 halo DIT nia performe aumenta sa’e tan de’it aperta jogadór Nagardjo sira dada iis la hetan iha kampo laran.

Jogu kontinua la’o teki teki iha mentu 90 jogadór DIT Xavier hetan tan oportunidade di’ak lansa golu ida muda rezultadu tur metin ba 4-0 halo Nagardjo tenke hakneak hodi fó onra ba DIT tanba menutu termina ona konsege fó golu haat hodi save metin pontu tolu no Nagardjo tenke hela ho pontu zero.

Eskuad DIT:

Aderito Fernandes (55), Romario Moniz (23), Elivs Silva (9), Ubaldo Belo (16), Edivaldo Castro (24), Rui da Costa (11), Lamberto Ximenes (28), Ervinho Soares (20), Serafim Brito (17), Josin Cunha (10), Marcos Barros (82).

Suplente:

Joanico Guterres (31), Leonardo Barros (25), Bonaventura Kalau (44), Feliciano Gonsalves (19), Leopoldo Guterres (66), Xavier Sila (29), Julio Barreto (21), José dos Santos (7), Nelson Boavida (15), Zito Morreira (5), Anito Cesario (12).

Treinadór: Mial Armand

Eskuad Nagardjo:

Sandy Kurnia (12), Abrão Mendonça (23), Pedro Belo (4), Luis Soares (22), Jobelquim da Costa (77), Custodio da Costa (8), Manuel Cristo (13), José da Costa (18), Leonijio da Cruz (7), Kalaus Bilasi (6), Yermias da Costa (17).

Suplente:

Marcos Guterres (1), Andre Soares (16), Mario Neves (24), Palomito Ribeiro (15), Januario Fernandes (19), Bovio Soares (2), Fortonato Sunquero (14), Rique Alves (11), Bonifacio Cabral (9), João Sequeira (28), Nelson Freitas (10).

Treinadór:

Nidio Neto.

Jogu ne’e dirije hosi árbitru Fransisco Pereira, juiz liña Paulo da Costa, Pedro Santiago no árbitru rezerva Joanico Gama.

Jornalista: Hortencio Sanchez

Editór : Zezito Silva