Top

Komandu PNTL rejista feto ho pursentu 32 okupa pozisaun

Segundu Komandante Jerál PNTL, Komisáriu Mateus Fernandes. Imajen Tatoli/Egas Cristovão

DILI, 08 marsu 2023 (TATOLI) – Segundu Komandante Jerál Komisáriu Polísia, Mateus Fernandes, hateten Komandu PNTL rejista feto ne’ebé mak okupa pozisaun iha instituisaun PNTL foin atinje pursentu 32.

“Dezde Instititusaun Polísia Nasionál Timor-Leste harii, totál feto ne’ebé servisu iha instituisaun ida ne’e hamutuk 600. Husi númeru ne’e foin iha pursentu 32 mak okupa kargu xefia iha instituisaun PNTL”, Mateus Fernandes, dehan iha nia intervensaun bainhira partisipa serimónia komemorasaun loron mudiál feto instituisaun PNTL ne’ebé realiza iha auditoria Sentru Formasaun Polísia (CFP, siglpa portugés), kuarta ne’e.

Maske nune’e,  Komandu PNTL sei la taka matan ba feto sira ne’ebé halo kna’ar iha instituisaun PNTL, Komandu sei kria kondisaun hodi kontinua buka kapasita feto sira iha instituisaun polísia iha área oinoin, atu bele garantia proporsionalidade no bele atinje meta ne’ebé promove igualdade jéneru iha PNTL nian.

“Ita bo’ot sira hatene Komandu PNTL hahú atraza ona planu estrátejiku PNTL nian 2025-2037 hosi planu estratéjiku ida ne’e, atu dezenvolve di’ak liu PNTL iha futuru. Iha planu ida ne’e, ita mós sei hasa’e feto iha instituisaun liuliu oinsá hamosu proporsionalidade feto okupa pozisaun sira iha instituisaun. Planu estrátejiku institusaun nian sei lansa iha 27 marsu tinan ne’e hosi Prezidente Repúblika”, nia dehan.

Iha biban ne’e, Komisáriu Polísia, Mateus Fernandes, rekoñese feto PNTL sei menus okupa iha kargu xefia hanesan Komandante Munisípiu inklui menus partisipa iha treinamentu fíziku sira.

“Ita bo’ot sira haree feto sira menus envolve aan iha treinamentu sira ba misaun ba pás no okupa pozisaun iha komandante munisípiu sira tanba kuandu atu okupa kargu sira ne’e presiza tuir formasaun iha Eskola Pimpinan Polisi maka foin okupa kargu ida ne’e”, nia informa.

Tuir nia, kolokasaun feto iha Unidade Espesiál Polísia (UEP) liuliu envolvimentu ba Batalão Ordem Públika (BOP) no Corpo Seguransa Pessoál (CSP) sei menus, tanba treinamentu todan tanba ne’e mak la fasíl ba feto sira hodi halo.

“Maibé ba oin Komandu sei kontinua buka kapasita feto sira atu iha institsaun PNTL nian bele eziste duni proposionalidade liuliu igaulidade jéneru”, Komisáriu Mateus Ferndantes dehan.

Iha fatin hanesan, Repezentante Sekretaria Estadu Igualdade no Inklusaun  Armando da Silva, kongratula ba selebrasaun loron mudiál ne’ebé komemora hosi instituisaun PNTL.

“Ha’u lori Sekretaria Estadu Igualdade no Inklusaun nia naran hato’o parabens ba PNTL feto timoroan sira no feto mudiál ne’ebé ohin selebra sira nia loron”, Armando revela.

Partisipa iha selebrasaun loron mudiál feto instituisaun PNTL mak  Segundu Komandante Jerál Komisáriu Polísia Mateus Fernandes no Parseiru Internasionál sira.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!