Komunidade Luro impede konstrusaun eskola rua iha Lautém

DILI, 08 marsu 2023 (TATOLI)–Komunidade Luro-Lautém ne’ebé hela iha Luro halo impedimentu ba prosesu reabilitasaun no konstrusaun edifísiu Pre-Eskolár ida no ensinu báziku Sentrál ida tanba konsidera rai ne’ebé Governu utiliza hodi konstrui eskola rua ne’e sira-nia rain.

Diretór Servisu Edukasaun Munisípiu Lautém (DSEML), Rui Manuel Miranda da Costa Branco, hateten tanba mosu disputa rai entre komunidade ho parte eskola ne’e mak nia rasik hamutuk ho terra no propriedade Munisípiu Lautem tun ona ba terrenu hodi neutraliza situasaun.

“Edifísiu eskola rua ne’ebé ita nia komunidade sira impede ne’e ninia prosesu konstrusaun no reabilitasaun ne’e atinje ona 80% maibé tan de’it mosu impedimentu hanesan ne’e presiza rona komunidade ninia esplikasaun,” Rui Manuel hateten ba Agência Tatoli lihosi telefónika, kuarta ne’e.

Maibé, nia dehan, tuir Autoridade Edukasaun Lautém ne’e katak bainhira sira tuun ba terrenu atu hasoru komunidade sira-ne’ebé halo impedimentu ba PKR ne’e sira ida mós la marka prezensa.

Ho nune’e, parte terra deside ona katak prosesu konstrusaun no reabilitasaun la’o nafatin ba futuru mak mosu nafatin impedimentu sira mak sei ba hatán.

Tuir nia, edifísiu eskola rua ho sala-de-aula lima ne’ebé hetan impedimentu hosi komunidade ne’e lokaliza iha Luro. eskola rua mak Edukasaun Pre-Eskolár ho sala-de-aula rua no ensinu báziku Sentrál ho sala-de-aula tolu.

Kondisaun edifísiu rua ne’e rasik ninia prosesu atinje ona 80% no konsidera hela de’it plafon no monta tan de’it vidru, eskola rua ne’e rasik tama iha projetu komunitária.

Governu tau oportunidade hodi konstrui eskola ne’e tanba estatutu eskola ne’e eziste dezde tempu okupasaun Indonézia, maibé tanba kondisaun eskola ne’e estraga ona entaun Governu hatama mós iha planu PKR.

Jornalista : Tomé Amado

Editór   : Cancio Ximenes