DILI, 07 marsu 2023 (TATOLI)–Prezidente Autoridade Munisípiu Dili (PAM), Guilhermina Filomena Saldanha, husu ekipa jestaun programa (EJP) 17 iha Dili loke lalais konta bankária tanba kestaun ne’e afeta ba implementasaun programa merenda eskolár iha Dili.
“To’o agora, ita sei hein hela grupu EJP 17 ninia konta bankária. Bainhira sira hetan hotu ona mak ita sei halo prosesa hodi transfere osan ba sira-nia konta bankária,” PAM Dili ne’e hateten ba Agência Tatoli iha Palásiu Governu, kuarta ne’e.
Antes ne’e, Prezidente Autoridade Munisípiu Dili husu ona ba Banku Nasionál Komérsiu Timor-Leste (BNCTL) atu apoiu lalais hodi prosesa loke konta bankária ba grupu 17 ne’e, no banku rasik responde ho pozitivu tebes agora depende ba grupu sira-ne’e ninia dokumentu korresponde duni ba kritériu sira-ne’ebé mak banku husu ka lae.
“Ita husu ona grupu atu aneksa lalais sira-nia dokumentu atu loke konta bankária tanba banku prontu nafatin atu apoiu grupu sira-ne’e ho lalais, tanba ita-nia Governu mós halo ona akordu ho BNCTL. Ne’eduni sira mak tenke hatama atu bele prosesa ona,” nia dehan.
Nia haktuir, planu programa merenda eskolár ne’e loloos hahú ona iha loron 01marsu fulan-marsu maibé atraza iha ekipa sira-ne’e. entaun agora Munisípiu Dili foti ona desizaun katak ba grupu EJP 17 ne’ebé mak kompleta ona sira-nia prosesu sira ho Banku bele hahú ona programa merenda eskolár ba eskola sira.
Programa merenda eskolár ne’ebé mak sei realiza iha Munisípiu Dili ne’e, ho total orsamentu hamutuk $3.393,166.56 no orsamentu ne’e mak sei transfere ba konta bankária EJP 17 nian hodi apoiu merenda eskolár ba labarik hamutuk 49.289.
Hosi totál dadus estudante 49.289 ne’e, kategoria ba estudante Pre-Eskolár hamutuk 3.971, kategoria eskola públiku iha estudante na’in-1.974 ne’ebé kompostu hosi feto 999 no mane 948, no eskola privadu hamutuk 2024 ne’ebé kompostu hosi feto na’in-1.002 no mane hamutuk 1.022.
Entretantu, estudante nivél ensinu báziku hamutuk 45.291 ne’e, kategoria ba eskola públiku iha na’in-38.478 ne’ebé kompostu hosi mane 20.015 no feto 18.463, no ba eskola privadu iha na’in 6.813 ne’ebé kompostu hosi mane na’in-3.683 no feto hamutuk 3.130.
Jornalista : Tomé Amado
Editór : Cancio Ximenes
