Kooperativa Boneca Ataúro hetan rendimentu rihun US$23 kada tinan

ATAÚRO, 09 marsu 2023 (TATOLI) – Kooperativa Boneca Ataúro, kada tinan hetan rendimentu hamutuk US$23.ooo,00 liuhusi atividade kooperativa sira.

Kooperativa Boneca Ataúro estabele iha 2006, no agora daudaun ho ninia atividade prinsipál tolu – Pordusaun Boneca Ataúro, Restautante Manukoko no resiklazen.

“Antes Covid-19, kada tinan ita hetan husi US$60.000 to US$80.000 dolar amerikanu. Maibé, iha tinan tolu ikus ne’e, ami hetan de’it mais ou menus US$23.000 kada tinan,”Prezidente Koperativa Boneca Ataúro, Virginha Soares hato’o ba jornalista sira, iha Ataúro vila, kuarta semana ne’e.

Nia hatutan, osan ne’ebé mak hetan sempre aloka ba fatin tolu – saláriu ba traballadór, sosa materiál ba prdusaun no aloka ba fundu ba kooperativa.

Kooperativa Boneca Ataúro mós fó apoiu ba grupu kreativu feto rua iha suku Maquili foka ba produsaun Tais no resiklazen ropa uzadu ka ‘obralan’ ba produtu seluk.

Adminsitradór munisípiu Ataúro, Domingos Soares promete sei buka fatin permanente ida ba kooperativa refere. “Ita halo hela esforsu para buka fatin di’ak ida hodi apoiu atividade produsaun kooperatiava nian. Entaun sira sei kontinua uza fatin ida ne’e, no tempu ruma, ita sei hetan fatin adekuadu ida hodi apoiu atividade produsaun no promosaun kooperativa ninian.”

“Ita mós sei nafatin kontinua halo promosaun ba ativiadade kooperativa ida ne’e hodi ajuda sira dezenvolve diak liutan,” Administradór kompromete.

Kooperativa Boneca Ataúro hahú fofoun hanesan grupu  ki’ik ida ho membru na’in haat. No ikusmai, iha 2009, grupu ne’e transforma sai kooperativa ida ho membru 25, no agora daudaun iha ona membru totál hamutuk 64.

Jornalista     : Filomeno Martins 

Editór             : Rafael Ximenes de A. Belo