Dosente UNITAL 11 sei kontinua sira-nia estudu doutoramentu iha Indonézia
DILI, 10 marsu 2023 (TATOLI)–Reitór Universidade Orientál Timor Lorosa’e (UNITAL), Florindo Pereira, hateten dosente maestradu permanente na’in-11 hosi Universidade Oriental Timor Lorosa’e (UNITAL) sei kontinua sira-nia estudu doutoramentu iha universidade sira iha Indonézia.
Nia hatutan, dosente hirak ne’e sei eskola tuir tuir área espesífiku ida-idak nian iha Jakarta, Padang, Universidade Achamad Yani Eogyakarta no iha Universidade Airlangga, tanba UNITAL hakarak garante kualidade iha rekursu umanu hodi lori Instituisaun ensinu superiór privadu ne’e ba futuru ida di’ak liután.
“Ita-nia dosente na’in-11 ne’ebé kontinua sira-nia estudu iha Indonézia ne’e na’in-hitu iha Jakarta, na’in-rua iha Padang, na’in-ida iha Universidade Ahmad Yani Yogyakarta no na’in-ida seluk iha Universidade Airlangga,” Florindo Pereira hateten ba jornalista sira iha Palásiu Governu, sesta ne’e.
Tuir nian, UNITÁL haruka dosente na’in-11 permanente ba kontinua sira-nia estudu doutoramentu iha Universidade sira iha Indonézia ne’e, tanba antes ne’e UNITAL ho universidade sira-ne’e halo ona nota entendimentu hamutuk oinsá universidade sira-ne’e bele apoiu kualifikasaun ba rekursu umanu iha UNITAL.
Dosente permanente ne’ebé rejista iha UNITAL agora ne’e kuaze 200-resin, sira-ne’ebé hetan uluk oportunidade hodi kontinua estudu iha doutoramentu ne’e na’in-11, no bainhira sira fila ona mak Universidade sei haruka fali grupu segundu ba kontinua sira-nia estudu iha Universidade sira-ne’e.
“Ita hakarak dosente permanente sira iha UNITAL ne’e tenke S3 hotu, atu nune’e ita bele garante kualidade iha rekursu umanu UNITAL nian, hodi bele apoiu prosesu akadémiku ba estudante sira ho kualidade mós,” nia dehan.
Oinsá atu garante kualidade ba dosente permanente sira iha UNITÁL, Florindo hatán, sira husu ona apoiu ba Universidade Malang hodi mai fó formasaun ba dosente permanente sira kona-ba pedagojia.
“Ida-ne’e importante tebes ba dosente sira. tanba dosente bele matenek maibé laiha maneira di’ak atu hanorin mós sai difikuldade ida ba universidade,” nia dehan.
Jornalista : Tomé Amado
Editór : Cancio Ximenes
