Top

CNE sei konvoka enkontru haree fali asuntu koligasaun partidaria rua

Prezidente CNE, José Agostinho da Costa Belo. Imajen Tatoli/Francisco Sony.

DILI, 13 marsu 2023 (TATOLI) – Prezidente Komisaun Nasionál Eleisaun (CNE, sigla portugés), José Belo, informa CNE sei konvoka fali enkontru hodi haree fila fali koligasaun partidaria pré-eleitórál rua ne’ebé mak hato’o ona pedidu mai CNE hodi konkore iha eleisaun parlamentár.  

Koligasaun Partidaria Pré-eleitorál rua ne’ebé hatama ona pedidu ba CNE mak Frente Ampla Demokrátiku (FAD), kompostu hosi, Partidu Frente Rekonstrusaun Nasionál Timor-Leste Mudansa (Frente Mudansa), Partidu Uniaun Demokrátiku Timorense (UDT), Partidu Sentru Asaun Sosiál Demokrátiku Timorense (CASDT), Partidu Dezenvolvimentu Nasionál (PDN).

Enkuantu Koligasaun Partidaria PDRT- APMT, kompostu hosi partidu rua, maka Partidu Demokrátiku Repúblikanu Timorense (PDRT) no Partidu Asosiasaun Populár Monarquia Timor (APMT).

Koligasaun partidaria pré-eleitorál sira ne’e aprezenta ona sira nia lista koligasaun partidaria pré-eletorál hanesan partidu koligasaun partidaria pré-eleitórál ba orgaun eleitórál ho baze ba lei eleisaun parlamentár hodi konkore eleisaun lejislativa 2023.

“Ami sei konvoka enkontru hodi haree fila fali ba partidu koligasaun pré-eleitorál rua ne’ebé hatama ona sira-nia pedidu mai CNE atu konkore eleisaun lejislativa”, José Belo, hateten ba TATOLI iha nia kna’ar fatin CNE Colmera, segunda ne’e.

Nia esplika, Tribunál Rekursu (TR) husu atu submete fila fali partidu koligasaun pré-eleitorál sira ne’ebé hatama ona sira-nia pedidu mai CNE, tenke haruka fali sira-nia dokumentu ba fali Supremu Tribunál Justisa atu haree.

“Karik lista koligasaun partidaria pré-eleitorál sira ne’ebé hatama ona sira-nia pedidu mai iha CNE atu konkore eleisaun lejislativa ne’e, karik CNE sei submete hikas ba Supremu Tribunál Justisa hodi legaliza ka lae, ne’e depende ba rezultadu hosi enkontru ohin loraik ne’e mak ami foin hatene”, Prezidente CNE José Belo hatutan.

Antes iha loron 7 fulan marsu Sekretariadu Tékniku Administrasaun Eleitorál (STAE), publika ona jornál repúblika kona-ba koligasaun partidaria tolu, hanesan Aliansa Demokrátiku (AD) ne’ebé kompostu hosi partidu rua; Partidu Liberta Povu Aileba (PLPA), Partidu Dezenvolvimentu Populár (PDP). Frente Ampla Demokrátiku  (FAD), kompostu hosi partidu tolu mak Partidu Frente Rekonstrusaun Nasionál Timor-Leste Mudansa (Frente Mudansa), Partidu Uniaun Demokrátiku Timorense (UDT), Partidu Sentru Asaun Sosiál Demokrátiku Timorense (CASDT), Partidu Dezenvolvimentu Nasionál (PDN).

Nune’e mós, koligasaun Partidaria PDRT-APMT, kompostu hosi partidu rua, maka Partidu Demokrátiku Repúblikanu Timorense (PDRT) no Partidu Asosiasaun Populár Monarquia Timor (APMT).

Prezidente Tribunál Rekursu Deolindo dos Santos, husu ba orgaun eleitorál hanesan CNE atu submete dokumentu koligasaun partidaria pré-eleitorál sira ne’ebé, atu Tribunál bele legaliza dokumentu sira hodi koaligasaun partidaria bele konkore iha eleisaun lejislativa.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!