Makikit Laulara halo “terus” Académica 2-0
DILI, 14 marsu 2023 (TATOLI) – Ekipa primeira divizaun Liga Futeból Timor-Leste (LFTL) ho naran estimadu AD SLB Laulara idéntiku ho Makikit Laulara susesu iha nia jornada da-tolu hodi halo terus adversáriu hosi Universidade Nasionál Timor-Lorosa’e (UNTL) Académica FC ho eskore 2-0.
Jogu ba ekipa rua, hanesan jogu kontinuasaun LFTL époka 2022-2023 ne’ebé hala’o iha Estádiu Munisipál Dili, tersa loraik ne’e.
Hanesan baibain jogu hahú armada rua tenke lansa kedan kontra no atake ba malu tuir tékniku no abilidade ekipa ida-idak nian ho alvu ne’ebé klaru taka ho golu.
Maibé SLB lansa presaun ne’ebé másimu kedan iha menutu primeiru, nune’e iha menutu 6 jogadór estranjeiru Michel Hutabarat (26) utiliza pozisaun livre lansa kedan bola ba rede Académica nian, ikus mai guarda rede Académica Jemecriz Pereira (1) la antisipa ho di’ak, bola tama liu ba rede laran ikus hatur rezultadu ba 1-0.
Hosi golu ne’ebé iha Académica la nonok de’it kontinua halo jogu ho defensivu ka pasa bola badak ba malu atu aproveita fallansu SLB nian nune’e bele finaliza golu ruma maibé estratejia hirak ne’e hela de’it hanesan estratejia tanba defeza SLB halo barreira metin la fó Valda ba avansadu Académica tama liubá laran.
Ho presauan ne’ebé SLB halo, Académica tenke servisu makas atu ultrapasa tama liña oin SLB nian maibé la konsege ho nune’e menutu primeira parte termina rezultadu hela ho 1-0.
Hakur ba segunda parte ekipa rua nafatin halo jogu ho tensaun ne’ebé makas liuliu Académica muda estratejia ba joga loke ka halimar bola dook maibé jogadór SLB tenta halo mate tutuir jogu Académica nian.
La’os SLB de’it mak hamate Académica nia jogu maibé liña klaran Académica nian mós halo mate tutuir jogu SLB nian hodi halo presaun makas ba avansadu prinsipál SLB Mouzinho de Lima (10) labele halo sutu livre ba guarda rede Académica nian.
Jogu sai manas liután bainhira hafutar ho lian adeptus klube rua ne’e nian ne’ebé tur haleu metin iha tribun leten Estádiu nian hakilar makas fó suporta másimu tebes.
Ho suporta hirak ne’e halo jogadór ekipa rua halo jogu ho másimu maibé sorte aat monu liu ba Académica tanba nunka prodúz golu ruma hodi halo empata jogu ne’e.
SLB matenek iha nia estratejia halo jogu bonito iha kampo laran ho nune’e iha mentutu 82 jogadór Kornelis Portela (11) hetan bola pasa livre ida hosi nia kolega Alexandro Lemos (9) ezekuta kedan ba rede Académica nian muda rezultadu metin kedan ba 2-0.
Hosi rezultadu ne’ebé iha aumenta tan velosidade jogu entre ekipa rua tanba jogadór sira komesa provoka malu iha kampo laran hodi halo erru hasoru malu.
Sorte aat liu ba kapitaun Académica Joel Gaio (6) halo protestu makas hasoru árbitrajen nune’e árbitru deside fó kartaun mean hodi haruka nia tenke sai kedan mai kampo liur iha menutu 88.
Ho desizaun árbitru nian ne’e halo jogu ne’e barullu makas maibé komisaun ba jogu no seguransa sira konsege halo kalma iha menutu balu nia laran jogu kontinua la’o ho normál fali.
Maske jogu la’o normál hikas maibé laiha tan golu rua mak akontese nune’e menutu 90 termina vitória hela ba SLB hodi hetan pontu tolu enkuantu Académica obrigadu hela ho derrota.
Eskuad Académica:
Jemecriz Pereira (1), Erolismo Martins (4), Calistro Pereira (22), Lexy Junior Atok (26), Joel Gaio (6), Alexandre da Cruz (10), Juvinal Boavida (19), Hilario Ximenes (11), Dani Ardianto (2), Damianus Putra (12), Nortey Kojo (18).
Suplente:
Otilio Guterres (30), Leandro Amaral (16), Filipe Ling (5), Helmerino da Costa (8), Florindo Soares (21), Jose Freitas (23), Helder Lopes (17), Antonio Ximenes (13), Ary Cristovão (3), Jesualdo da Costa (27) no Melchior Cristovão (14).
Treinadór:Lusinho Saco
Eskuad SLB:
Andrew Mensah (13), Bakayoko ozi (2), Micehl Hutabarat (26), Jhon Frith (6), Cristovão Fernandes (23), Filipe Oliveira(24), Fernando de Carvalho (3), Jeremias Baptista (69), Kornelis Portela (11), Alexandro Kefi (21), Mouzinho de Lima (10).
Suplente:
Filonito Nougueira(12), Tomas Sarmento (4), Natalino da Costa(8), Nidio Alves (93), Aldo Amaral (19), Domingos Ribeiro (22), Alexandro (9), Norbert Gonçalves (14), Vabio Pires (28), Marques de Carvalho (29), José Pinto (27), .Vabio Pires (28).
Treinadór: Julião Monteiro
Jogu ne’e dirije hosi árbitru Eufrasio da Costa, juiz liña Antonio Carvalho, Ivo Moniz no árbitru rezerva João Paulo da Costa.
Jornalista: Hortencio Sanchez
Editór : Zezito Silva
