MNEK atualiza servisu iha rai-liur ba Xefe Governu
DILI, 14 marsu 2023 (TATOLI) – Ministra Negósiu Estranjeiru no Kooperasaun (MNEK) Adaljiza Albertina Xavier Reis Magno, tersa ne’e, hasoru malu ho Primeiru-Ministru Taur Mtan Ruak hodi atualiza servisu durante hala’o iha rai-liur.
“Foin lalais, ha’u halo viajen ba nasaun sira hanesan, Jeneva, Singapura no Doha, buat hotu la’o ho susesu, ida ne’e mak ha’u mai partilla ba Primeiru-Ministru”, Ministra Magno dehan iha Palásiu Governu, ohin.
Ministra rekorda, reuniaun nível altu Direitu Umanu iha Jeneva partisipa hosi Ministériu Negósiu Estranjeiru hotu iha mundu ho objetivu aprezenta kona-ba situasaun direitu umanu iha ida-idak nia nasaun.
Aleinde ne’e vizita iha Singapura, Ministra Magno hasoru malu ho nia omólogu Ministra Negósiu Estranjeiru Nova-Zelandia nian hodi asina akordu servisu kona-ba mellora dezenvolvimentu Timor-Leste nian iha área oioin.
Enkuantu, iha Doha partisipa iha reuniaun nível altu kona-ba Least Developed Countries (LDC-sigla inglés) ne’ebé partisipa hosi nasaun menus dezenvolvidu sira hodi ko’alia kona-ba situasaun hirak ne’ebé nasaun sira enfrenta.
Tanba ne’e pozisaun Timor-Leste nian iha reuniaun ne’e, husu ba Nasaun Unida atu halo re-avaliasaun hafoin prepara ba graduasaun ka sai hosi nasaun menus dezenvolvidu.
Magno hatutan, Primeiru-Ministru apresia ho servisu hirak ne’ebé MNEK halo iha liur durante ne’e.
“Primeiru-Ministru apresia tebes ho servisu sira, ne’ebé ko’alia oinsa iha tempu besik bele bolu membru Nasaun Unida sira mai halo re-avaliasaun atu ita bele sai hosi lista menus dezenvolvidu”, nia relata.
Tuir avaliasaun Nasaun Unida antes ne’e, Timor-Leste sai hosi lisa menus dezenvolvidu iha tinan 2025 maibé tanba dezafiu hirak ne’ebé hasoru hanesan, Covid-19, inundasaun iha 04 ábril liu-ba halo dezenvolvimentu paradu no ekonomia monu, posibilidade sei labele gradua iha tinan ne’ebé termina.
“Ida ne’e mak ita sei bolu sira mai halo fali re-avaliasaun atu haree bainhira mak ita bele sai hosi lista menus dezenvolvidu”, nia hakotu.
Jornalista: Hortencio Sanchez
Editór : Zezito Silva
