MS-OMS dizemina informasaun kodex alimentár ba liña ministeriál
DILI, 14 marsu 2023 (TATOLI) – Ministériu Saúde (MS) hamutuk ho Organizasaun Mundiál Saúde (OMS) dizemina informasaun kona-ba importánsia kodex alimentár ba liña ministeriál sira atu proteje konsumidór sira ba protesaun saúde iha Timor-Leste.
“Ami ohin enkontru ho Organizasaun Mundiál Saúde no liña ministeriál sira kona ba kodex alimentár ne’ebé iha objetivu rua mak atu dizemina informasaun kona-ba importánsia kodex ba diretór jerál iha liña ministerál sira no koalia kona-ba formasaun ba pontu vokál ba liña ministeriál sira ne’ebé mak tama iha komisaun nasionál ba kodex alimentár”, Diretora Jerál Prestasaun Saúde iha MS Odete da Silva Viegas, ba jornalista sira bainhira remata advokasia kodex nível altu no workshop kodex iha Hotel Novo Turismu, ohin.
Nia rekorda, Timor-Leste atu tama ba membru kodex alimentár liuhosi prosesu naruk ida ne’ebé mak halao tinan hirak liubá no felizmente iha 2018 konsegue sai membru ba kodex alimentár ba nasaun 188.
“Importánsia papél kodex mak atu proteje ita-nia konsumidór sira ba protesaun saúde ba konsumidór sira no ita mós haree katak ita-nia rain importasaun lubuk, ita la konsege kontrola maibé liuhosi meiu ida-ne’e, ministériu relevante sira ida-idak bele iha responsabilidade nia papél atu prepara kapasita rekursu ne’ebé iha no prepara alvu hahan seguru no kualidade atu ita bele dezenvolve ita-nia an bele kompete iha nível rejionál no nível internasionál”, nia informa.
Nia esplika, pontu vokál husi liña minsiteriál ne’ebé marka prezensa mak MS, Ministériu Agrikultura, Minitériu Obras Publika, Ministériu Finansas no Ministériu Turizmu Komérsiu no Indústria.
Iha fatin hanesan, Representante Organizasaun Mundiál Saúde iha Timor Leste Arvind Mathur, informa Timor-Leste sai ona membru ba kodex alimentár ba dala 188 no Govenru Timor-Leste atu haree sira nia esforsu no saida mak presiza atu halo.
“Foin lalais OMS apoiu no servisu hamutuk ho MS halo ona asesmentu ida hodi haree lakuna no problema ne’ebé mak durante ita enfrenta no saida mak ita bele hadia mak ami nafatin fó apoiu liuliu atu haforsa sistema kontrolu aihan no atu dezenvolve padraun aihan nian hodi kontinua haforsa sistema kontrolu kualidade aihan ne’ebé mak tama no aihan ne’ebé mak prodúz iha rai-laran”, nia konklui.
Jornalista : Felicidade Ximenes
Editór : Zezito Silva
