Konstrusaun estrada Tasi-Tolu atinje ona 80%
DILI, 15 marsu 2023 (TATOLI)— Ministru Obra Públika (MOP), Abel Pires, hateten, konstrusaun estrada Tasi-Tolu atinje ona 80% no iha tempu badak bele finaliza ona tanba servisu todan sira ne’e ramata ona.
Nia dehan, kona-ba konstrusaun estrada Tasi-Tolu, servisu todan sira ramata ona. Tanba estrada refere tau hotu ona aspal, agora hein dalan tun ba tasi-ibun sira ne’e mak sei tau tan aspal atu proteje bee dalan sira ne’ebé liga ba area tasi-ibun, nomos sei resolve tan trotoár sira.
“Ha’u kontente ho progresu ne’ebá, tanba agora bee dalan sira mós rezolve ona ne’ebé iha risku ba inundasaun sira mós menús ona. Ita bele dehan konstrusaun estrada Tasi-Tolu bele atinje ona 70% no 80%. Ho ida ne’e, servisu todan sira ne’e ramata ona,” Abel Pires hateten ba jornalista iha Palásiu Governu, Dili, kuarta ne’e.
Nia dehan, difikuldade ka problema oituan ne’ebé kompañia hasoru iha terrenu mak konstrusaun ramata tarde tanba fatin ne’ebá movimentu transporte makaas, no negosiante sira mós la fó fatin entaun kompañia servisu haknauk fali tempu mak hodi halo servisu.
“Sá fulan mak ramata ha’u seidauk hatene, maibé ho progresu ne’ebé iha hanoin, besik hotu ona,” nia dehan.
Konstrusaun estrada Tasi-tolu ne’e rasik kaer hosi kompañia Jonize Unipessoal Lda, Obra refere bazeia ba pedidu projetu emerjénsia Road Upgrading Project Dili, (Raikotu) Tasi Tolu, (Road link A 03-01), Stasaun 8-000- Stasaun 8+743 246 ne’ebé MOP aprezenta tiha loron 31 marsu liubá iha KAFI.
Jornalista : Arminda Fonseca
Editora : Armandina Moniz
