iklan

EKONOMIA, HEADLINE

Manutensaun auto-estrada Suai, MOP hein rezultadu konkursu Públiku hosi CNA

Manutensaun auto-estrada Suai, MOP hein rezultadu konkursu Públiku hosi CNA

Kondisaun auto-estrada iha munisípiu Covalima Suai, ne’ebé hetan nakfera kauza hosi udan. Imajen Tatoli

DILI, 15 marsu 2023 (TATOLI)— Ministru Obra Públika (MOP), Abel Pires, hateten, relasiona ho kondisaun auto-estrada iha munisípiu Covalima Suai, ne’ebé hetan nakfera kauza hosi udan, daudaun kompañia sira hatama ona pedidu ba Komisaun Nasional Aprovizionamentu (CNA, sigla portugés).

“Informasaun ne’ebé ha’u rona, konkursu la’o hela, kompañia sira hatama ona sira-nia domentu konkursu públiku nian ba CNA. Entaun ida ne’e CNA nia servisu, no kompañia sira sei esplika didi’ak mak foin CNA foti rezultadu ne’ebé no sei lori  tempu no ita hotu hein rezultadu hosi CNA,” Abel Pires, hateten ba jornalista  iha Palásiu Governu, Dili, kuarta ne’e.

Nia dehan, prosesu konkursu públiku iha ona CNA, maibé rezultadu atu sai sedu ka tarde ne’e, depende ba CNA tanba sira mak haree dokumentu sira ne’e  mak sei foti desizaun.

Notisia relevante : MOP Hahú Reabilita Auto Estrada Suai

Nia afirma, auto-estrada iha Suai ne’ebé hetan estragu kauza hosi udan la’os hotu kedas maibé iha fatin balu de’it hanesan, iha parte suku Matai entre bairru Holbelis nian.

Entertantu auto estrada iha Suai inagura iha loron 17 novembru 2018 hosi eis Ministru Obra Públika, Salvadór Eugenio Soares dos Reis Pires ho eis Ministru Estadu Prezidénsia Konsellu Ministru, Agio Pereira.

Auto estrada ne’e rasik  liga Fatucai ba Zumalai ho kilométru 303 no gasta orsamentu Millaun $304.

Jornalista : Arminda Fonseca

Editora    : Armandina Moniz

 

iklan
iklan

Leave a Reply

iklan
error: Content is protected !!