iklan

JUSTISA, HEADLINE

PD submete lista kandidatura ba TR

PD submete lista kandidatura ba TR

Símoblu Partidu Demokrátiku.

DILI, 15 marsu 2023 (TATOLI) – Primeiru Vise Sekretáriu Jerál Partidu Demókratiku (PD) PD, Arcanjo Leite, hateten prezensa partidu PD iha Tribunál Rekursu hodi kumpri ba prazu aprezentasaun lista kandidatura.

“Ohin ami mai submete lista kandidatura deputadu foun sira ba eleisaun lejislativa 2023-2028 ba Tribunál Rekursu, ne’e hanesan aktu ba komprimentu rekezitu legál ne’ebé vigór”, Arcanjo Leite ba jornalista sira hafoin aprezenta lista kandidatura ba TR, kuarta ne’e.

Nia dehan, submisaun lista kandidatura ne’e, TR mak iha kompeténsia halo verifikasaun hodi hetan legalizasaun atu PD bele kompete ba eleisaun parlamentár tinan ne’e.

PD aprezenta lista kandidatura ba TR katak tuir lei iha lista hamutuk ema nain 90 kompostu husi suplente nain 25 no efetivu 65.

‘Iha lista kandidatura ne’e, iha mós partisipasaun deputada feto 30%”, Arcanjo Leite revela.

Partidu PD submete lista kandidatura ba TR, iha lista refere Prezidente Partidu Assanami Sabino no Sekretáriu Jeral Antonio Kalohan mak la troka.

“Enkuantu sira seluk ne’e, lista kandidatu priénse ho ema foun. PD ne’e harii kle’ur ona, entaun iha lista kandidatura submete ba TR ne’e maioria jerasaun foun hotu”, nia dehan.

Arcanjo salienta, PD kompromete preparadu hodi kompete iha eleisaun parlamentár.

“Ba kompaneiru sira iha rai laran no iha rai liur, lalika duvida hodi fó konfiansa ba partidu PD, tanba partidu ne’e iha ona esperiénsia naton ne’ebé envolve ona iha ukun, ami espera povu sei fó konfiansa ba partidu ne’e”, nia afirma.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!