DILI, 15 marsu 2023 (TATOLI) – Ekipa primeira divizaun Liga Futeból Timor-Leste (LFTL) Porto Taibessi FC susesu iha nia jornada da-tolu hodi “sona kuak” adversáriu Assalam FC ho golu tolu.
Jogu ba ekipa rua ne’e hanesan jogu kontinuasaun LFTL nian ne’ebé realiza iha Estádiu Munisipál Dili, kuarta loraik ne’e.
Ho derrota ne’ebé mak Assalam hetan taka dalan kedan ba nia hodi lidera tabela klasifikasaun provizóriu atu hakat ba kampiaun. Ho nune’e fó oportunidade ba AD SLB Laulara hodi lidera provizóriu tabela klasifikasaun ho pontu hitu.
Hanesan baibain menutu primeiru hahú ekipa rua lansa kedan kontra no atake ba malu tuir tekniku no abilidade ekipa ida-idak nian atu buka hatama golu bainhira se mak lais liu.
Porto Taibesi lansa jogu ho modelu ofensivu akompaña ho defensivu, enkuantu Assalam halo jogu ofensivu hakarak hatama golu lalais.
Esforsu hotu ekipa rua halo maibé laiha ida mak iha sorte atu hatama golu ho nune’e esforsu hirak ne’e hela de’it hanesan esforsu ba ekipa rua to’o menutu 45 termina rezultadu hela ho empata 0-0.
Hakur ba segunda parte ekipa rua nafatin halo kontrata atake masimu liu-tan bainhira adeptus sira ne’ebé tur iha tribun leten Estádiu nian la nonok hakilar ho lian makas halo jogadór sira iha vontade ne’ebé makas hala’o jogu ho masimu.
Treinadór Porto Taibessi matenek iha nia estratejia hodi halo mudansa total ba jogu hodi dada sai jogadór Frederico Sila (19) hodi hatama fali jogadór suplente Yohanes Jehaman (10) iha lina avansadu nune’e bele sobu defeza Assalam nian.
Mudansa estratejia ne’e la hela hanesan mudansa tanba hatudu rezultadu di’ak tanba iha menutu 50 jogadór suplente ne’e lansa golu primeiru hodi muda rezultadu ba 1-0.
Hosi golu ne’ebé iha halo Assalam tenke servisu makas liu tan atu halo empata jogu ne’e maibé la konsege tanba Porto Taibessi hala’o jogu ne’ebé brillante tebes.
Maski nune’e Assalam la lakon esperensa liu hosi nia jogadór sira nafatin lansa kontra no atake ne’ebé masimu tebes maibé sutu hirak ne’ebé avansadu Assalam lansa nunka kona iha alvu no balu guarda rede Porto Taibessi tenta simu no baku sai.
Porto Taibessi halo jogu ne’ebé bonito iha kampo laran halo Assalam susar atu hadau bola ho nune’e iha menutu 73 defeza Assalam halo erru hasoru jogadór Porto Taibessi nian árbitru deside fó kedan falta ba Porto Taibessi hodi halo sutu livre.
Hosi sutu livre ne’e hatudu duni prova no ezekuta hosi jogadór Edencio da Costa (13) bola tama liu ba rede laran halo guarda rede Assalam Nathanel Agbozo (30) tuda aan sala to’o bola tama liu ba laran muda rezultadu ba 2-0.
Ho golu ne’ebé iahlo Assalam nia mentalidade jogu tun kedan no laiha tan kbiit atu halao jogu ho masimu, maski nune’e árbitru deside fó adisionál tam menutu 10 ba jogu hodi kompleta menutu 100 pas.
Hosi menutu aumenta ne’e fó liu oportunidade ba Porto Taibessi liu hosi nia jogadór Yohanes hetan bola livre ida hodi lansa kedan sutu ba guarda rede Assalam nian bola tama liu ba rede laran muda kedan rezultadu ba 3-0.
Ho rezultadu ne’e fó kedan oportunidade ba Porto Taibessi hodi hodi save metin pontu tolu no Assalam hela ho derrota.
Eskuad Assalam:
Nathaniel Agbozo (30), Husen Costa (27), Jovanio Braz (8), Hermenio de Sousa (14), Lourenco Freitas (19), Francisco da Costa (28), Elias Mesquita (10), Aniso boavida (16), Emidio Braz (4), Edikah Godwin (13), Amir Hamzah (23).
Suplente:
Junilde Pereira (1), Hasan Costa (7), Martino Belo (33), Bonarudin Amin (17), Felisiano da Costa (92), Dom Lucas Braz (3), Tirjon Maia (15), Celsio Pereira (88), Alexandrino Miranda (26), Rahmatullah ghanizada (9), Daniel Appiah (11).
Treinadór: Gaspar Amaral
Eskuad Porto Taibessi:
Juvencio Henriques (1), Calaudio Araujo (4), Miguel Silva (2), Edencio da Costa (13), Frederico Sila (19), Feliz Gama (15), Anggiso Barbosa (12), Inosensius Ati (3), Jardel Piedade (9), Lazio Piedade (77), Danilson Araujo (16).
Suplente:
Marcio das Dores (24), Januario Pinto (5), Jerico Piedade (45), Nicson Berek (6), Nelvio Almeida (7), Romer Martins (17), Derson Ulu (14), Eusebio de Almeida (8), Helman Asan (11), Yohanes Jehaman (10), Gabriel Lopes (20).
Treainadór: Mirobaldo Bento
Tabela klasifikasaun provizoriu
Iha tabela klasifikasaun provizóriu lina da-uluk AD SLB Laulara ho pontu hitu, da-rua Assalam FC ho pontu hitu, da-tolu Porto Taibessi ho pontu neen, da-haat Emmanuel ho pontu neen, da-lima Academica ho pontu haat, da-neen Ultramar ho pontu haat, da-hitu Aitana ho pontu haat, da-ualu Karketu ho pontu tolu no ikus liu Ponta Leste ho pontu ida.
Jornalista:Hortencio Sacehez
Editór : Zezito Silva
