iklan

HEADLINE, SAÚDE

Espesialista neofrolojia husu Governu prepara fasilidade medikál husi primáriu-tersiáriu

Espesialista neofrolojia husu Governu prepara fasilidade medikál husi primáriu-tersiáriu

Hospital Nasionál Gidu Valadares (HNGV). Imajen Tatoli/Francisco Sony

DILI, 16 marsu 2023 (TATOLI) – Médiku Espesialista Neofrolojia iha Hospitál Nasionál Guido Valadares (HNGV) Gustavo Rosario da Cruz, husu ba Governu atu prepara fasilidade medikál husi primáriu, sekundáriu to’o tersiáriu, atu profisionál saúde sira fó atendimentu di’ak liután ba populasaun sira.

“Ita-nia ekipamentu médiku sira ne’e, Governu tenke prepara husi primáriu to’o tersiáriu atu nune’e fó atendimentu di’ak liubá populasuan sira tanba iha primáriu la iha ekipamentu ne’ebé sufisiente hanesan ekipamentu koko mii, ida ne’e la iha, entaun ita labele halo diagnosa”, Gustavo Rosario da Cruz, dehan iha TATOLI.

Nia dehan, fasilidade sekundáriu mak la iha profisionál saúde labele atende moras sira ne’e, entaun tenke halo referál mai nasionál.

“Ita haree husi sekundáriu mós ekipamentu médiku la iha, ita labele hatene ema ne’e moras rins ka lae no kauza husi saida, entaun ita tenke mai to’o tersiáriu difisil ona atu halo prevensaun tanba balun tama ona estadium ne’ebé mak grave”, nia esplika.

Nia husu ba Governu atu investe ekipamentu médiku, hahú husi primáriu, sekundáriu to’o tersiáriu atu bele fó atendimentu ne’ebé mais adekuadu ba popualsuan sira ne’ebé presiza.

Iha 2023, pasiente sira ne’ebé mak halo tratamentu fase raan iha HNGV hamutuk 112, husi númeru ne’e ema 14 mak mate no daudaun pasiente ne’ebé halo tratamentu hamutuk 98. Husi pasiente sira ne’ebé mai halo tratamentu maioria Munisípiu Dili, Baucau Lautem, Oe-cusse, Bobonaro, Ermera,Liquiça, Ainaro no Viqueque.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!