Top

FM kogratula Superintendente Xefe Herique da Costa ba Komandante Jerál PNTL foun

Komandante PNTL munisípiu Dili, Superientendente Xefe Polisia, Henrique da Costa. Imajen TATOLI/Francisco Sony

DILI, 16 marsu 2023 (TATOLI) – Diretór Ezekutivu Fundasaun Mahein (FM) Abel Amaral, lori Fundasaun Mahein nia-naran hato’o kongratulasaun ba Superintendente Xefe Polísia Henrique da Costa ne’ebé Governu nomea hodi okupa kargu Komandante Jerál Polísia Nasionál Timor-Leste (PNTL) foun ba mandatu tinan tolu.

“Ba dahuluk ita hato’o parabens ba Komandante Jerál PNTL foun, Superintendente Xefe Polísia Herique da Costa no segundu Komandante Jerál Superintendente Xefe Polísia Pedro Belo ba, tanba Governu fó fiar sira atu lidera institusaun  PNTL ba períodu tinan tolu tuir mai”, Abel Amaral hateten ba TATOLI iha nia kna’ar fatin Lecidere, kinta ne’e.

Tuir nia, ho ofisiál superiór PNTL nain rua ne’e nia lideransa bele dezenvolve instituisaun PNTL sai di’ak liután. Tanba ema nain rua ne’e iha esperiénsia.

“Kona-ba dezenvolvimentu institusionál nian, ita hotu hatene katak PNTL sempre halerik kona-ba rekursu umanu, ekipamentu no fasilidade sira, ha’u hanoin buat sira ne’e Komandante Jerál no Segundu Komandante Jerál foun tenke haree kontinua tau matan”, nia rekomenda.

Diretór husu ba Komandante Jerál no Segundu Komandante Jerál foun atu kontinua hatudu profisionalizmu no neutralidade atu eventu eleisaun parlamentár tinan bele lao di’ak.

“Nomeasaun ne’e aserta ho eleisaun parlamentár, entaun husu ba Komandante Jerál foun no mós nia-segundu komandante jerál atu fó atensaun  oinsa bele asegura eleisaun parlamentar bele lao ho di’ak”, nia dehan.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!