Partidu 18 aprezenta lista kandidatura ba TR

DILI, 15 marsu 2023 (TATOLI) – Prezidente Tribunál Rekursu Deolindo dos Santos, hateten partidu polítiku 18 aprezenta ona lista kandidatura mai Tribunál Rekursu (TR).
“Hafoin Tribunál Rekursu termina prazu ba aprezentasaun lista kandidatura, to’o oras ne’e Tribunál simu partidu 18 mak mai aprezenta sira-nia lista kandidatura”, Deolindo dos Santos dehan ba jornalista sira iha Tribunal Rekursu, Caicoli, kuarta ne’e.
Nia esplika, hosi partidu 18 ne’ebé aprezenta lista kandidatura só partidu Frente Rekonstrusaun Nasionál Timor-Leste Mudansa (Frente Mudansa) mak aprezenta sira nia lista kandidatura rua.
“Iha lista kandidatura ne’ebé Tribunál rejista ne’e iha 19 tanba Frente Mudansa mak aprezenta lista kandidatura rua”, nia hateten.
Maske nune’e, Tribunál Rekursu sei verifika hafoin deside.
“Tribunál sei verifika depois sei deside tanba klaru katak partidu ida labele iha lista rua, ne’e lei la permite, tanba ne’e maka plenaria Supremu Tribunál Justisa maka sei verifika atu hatene lista ida bele liu, konforme desizaun ikus hosi plenaria”, Deolindo afirma.
“Ha’u seidauk bele hateten katak lista ida ne’ebé mak liu ou lista ne’ebé ke la liu só plenaria verifika no deside katak ida ne’e mak liu ka lista rua ne’e bele la liu hotu, ne’e konforme verifikasaun hosi plenária”, nia salienta.
Nia dehan, hahú kinta (16/3) aban ba oin, Tribunál Rekursu sei verifika lista kandidatura hamutuk 19 ne’ebé mak partidu 18 aprezenta ba iha TR.
“Iha prazu loron sanulu (10) ba TR atu verifika lista kandidatura sira ne’e. Karik iha lista kandidatura ne’ebé mak partidu sira submete mai dokumentu balun ladauk kompletu. Entaun Tribunál sei komunika fali ba partidu sira hodi kompleta sira-nia lista iha oras 24, nune’e bele submete hikas mai Tribunál Rekursu atu haree”, nia adianta.
Deolindo dehan, prosesu ida ne’e, presiza servisu ne’ebé rigorozu no presiza tempu, ekipa tékniku hosi Tribunál Rekursu sira sei akompaña hosi Juiz nain haat ba verifikasaun sira ne’e atu bele haree ho forma ne’ebé loos. Atu nune’e desizaun ba prosesu sira ne’e sai ne’e tenke justu ba partidu polítiku sira.
Deolindo subliña, partidu 18 ne’ebé submete sira nia lista kandidatura mai iha Tribunál Rekursu mak CNRT, CASDT, Frente Mudansa (FM), Fretilin, KHUNTO, MPLM, PD, PDC, PDN. PLP, PLPA, PR PST, PUDD, PVT, UDT, ikus mak UDERTIM no APMT.
Jornalista: Natalino Costa
Editór : Zezito Silva

