Orsamentu ba GAM, IKS-TL simu rihun $335

DILI, 17 marsu 2023 (TATOLI) – Organizasaun Ikatan Keluarga Silat Timor-Leste (IKS-TL) Kera Sakti liuhosi Prezidente Silvestre Sufa, agradese ba Sekretáriu Estadu Juventude no Desportu (SEJD) ne’ebé apoiu ona orsamentu ba Grupu Arte Marsiál (GAM) sira hotu, nune’e IKS-TL simu ona rihun $335 atu dezenvolve organizasaun.

“Orsamentu ami simu hosi Governu hamutuk rihun $335, hosi osan ne’e ita fahe ba item lubuk ida mak hanesan apoiu administrasaun organizasaun nian, harii sede ba organizasaun, halo formasaun ba membru no treinadór sira, kompetisaun no seluk tan, ho orsamentu ne’e ba ami sufiseinte no agradese tebes ba Governu”, Prezidente dehan ba Agência TATOLI iha Farol Dili, ohin.

Nia dehan, dadaun ne’e IKS iha ona rai privadu ne’ebé hola iha tinan 2010 iha Maslidun Tasi-Tolu Dili no tempu besik estrutura hotu sei haree hodi deside harii sede permanente IKS nian.

Orsamentu ne’ebé oferese hosi SEJD ba organizasaun arte marsiál hotu ne’ebé liuhosi Komisaun Reguladora Arte Marsiál (KRAM) ho totál milaun $2.5.

Kritéria sira ba GAM atu asesu orsamentu ne’e mak

1. Organizasaun sira tenke entrega estatutu atuál tuir primeira diretiva KRAM nian.
2. Tenke aprezenta atividade saida de’it mak organizasaun sira halo tuir regulamentu segunda diretivu KRAM nian.
3. Organizasaun sira tenke aprezenta ba KRAM liuhosi ekipa jestaun kona-ba programa sira ne’ebé mak sei halo durante ne’e, hodi fasilita atividade sira resensiamentu ba membru sira, harii sede ba organizasaun no halo kompetisaun doméstika ka internál kada organizasaun ida-idak no ikus liu halo formasaun teknika ba árbitru, treinadór, formasaun ba jestaun organizasaun no seluktan.

Organizasaun GAM hamutuk 17 ne’ebé atu asesu ba fundu ne’e mak, hanesan federasaun sira hamahan aan iha Konfederasaun Desportiva Timor-Leste (CDTL-sigla Portugés) kompostu hosi Taekwondo, Wushu, Boxe, Aikido, Karate-do, Kempo no seluktan, Federasaun Silat Timor –Leste (FSTL) kompostu hosi Persaudaraan Setia Hati Terate (PSHT), Ikatan Kera Sakti (IKS-PTL), Kmanek Oan Rai Klaran (KORK), Seruling Dewata, Persya Diri no Padjajaran.

Nia esplika, osan ne’e sei utiliza ba pluri anuál durante tinan haat no kada organizasaun sei hetan tuir atividade ida-idak nian.

Osan ne’e fó  bazeia ba proposta organizasaun ida-idak ne’ebé aprezenta tuir sira-nia atividade, maibé sei fó tuir etapa kada pursentu depende ba ezekusaun arte marsiál sira no validade sira nia relatóriu.

Jornalista:Hortencio Sancehez

Editór : Zezito Silva