MOP halo ona atendimentu emerjénsia ba estrada kotu iha Eraulo Letefoho
DILI, 20 marsu 2023 (TATOLI)— Ministériu Obra Públika (MOP) iha loron sabadu (18/03) ne’e orienta ona tékniku sira hosi Diresaun Jerál Ponte, Prevensaun no Kontrollu Seia (DJEPPKS) hodi halo atendimentu emerjénsia ba estrada kotu iha suku Eraulo, postu administrativu Letefoho, munisípiu Ermera.
Estrada iha suku Eraulo hetan kotu tanba kauza hosi udan, maibé hafoin akontese MOP kontaktu kedas kompañia organiza ona hodi halo intervensaun ba estrada refere.
Bazeia ba nota komunikadu ne’ebé Agência Tatoli, asesu segunda ne’e, estrada refere ligasaun entre Letefoho no Atsabe mai Gleno, inklui mai Dili.
“Estrada ne’ebé kotu defikulta tebes movimentu komunidade nian hosi postu administrativu Letefoho no Atsabe mai Gleno kapitál Ermera nian maibé MOP halo ona atendimentu emerjénsia, hodi normaliza hikas estrada refere hodi fasilita movimentasaun komunidade iha diresaun refere,” hakerek nota komunikadu ne’e.
Jornalista : Arminda Fonseca
Editór : Armandina Moniz
