DILI, 20 marsu 2023 (TATOLI) – Diretora Servisu Saúde Munisípiu Manufahi, Florencia Corte Real Tilman, hateten Ospitál iha Manufahi presiza rekursu umanu no fasilidade médiku atu fó tratamentu ne’ebé di’ak ba populasaun sira.
“Ami iha Munisípiu Manufahi presiza rekursu umanus no ekipamentu médiku hanesan ekipamentu diagnose ne’ebé di’ak ihha sala maternidade no enfermaria nian”, Florencia Corte-Real Tilman dehan ba TATOLI via telephone, ohin.
Nia husu ba Governu atu aumenta tan rekursu umanu liuliu médiku, enfermeiru no parteira hodi bele apoiu servisu ospitalár ba komunidade sira iha Manufahi.
“Ami presiza médiku 20, parteira 20 no enfermeiru 20 tan atu koloka ba postu saúde, sentru saúde sira iha Munisípiu Manufahi hodi bele fó atendimentu ba ita-nia komunidade sira”, nia refere.
Profisionál saúde ne’ebé servisu saúde Manufahi husu atu koloka 23 profisionál saúde ba postu saúde, sentru saúde haat, maternidade haat no internamentu ida hodi fó atendimentu ba pasiente sira.
“Postu saúde iha Manufahi hamutuk 23, husi ne’e postu saúde haat mak seidauk iha profisionál saúde hanesan Weberek Ailora-Allas, postu saúde Foho lau Turiskai, Postu Saúde iha Tutuluro Same villa no Postu Saúde Aitemua iha Turiskai nian. Depois iha Sentru Saúde haat mak hanesan Same Villa, Sentru Saúde Alas, Sentru Saúde Fatuberliu no Sentru Turiskai mak sei presiza profisionál saúde”, nia esplika.
Profisionál saúde iha Munisípiu Manufahi, hanesan médiku hamutuk 30, enfermeiru 29, parteira 30 mak durante ne’e kobre iha sentru saúde haat iha Manufahi. Totál Postu Saúde iha Manufahi hamutuk 23.
Jornalista : Felicidade Ximenes
Editór : Zezito Silva
