HEADLINE, SEGURANSA

Suspeitu oho nia fen iha Ponte Comoro III entrega aan ba polísia

Suspeitu oho nia fen iha Ponte Comoro III entrega aan ba polísia

Portavós Komandu PNTL, Superintendente Xefe Polísia, Arnaldo Araújo. Imajen Tatoli/Francisco Sony.

DILI, 20 marsu 2023 (TATOLI) – Portavós Komandu Jerál Polísia Nasionál Timor-Leste (PNTL), Superintendente Xefe Arnaldo Araujo, informa suspeitu ne’ebé oho nia ferik oan iha área Tuti, Ponte Comoro III, Suku Comoro, Postu administrativu Dom Aleixo,  Munisípiu Díli entrega aan ona ba polísia.

Tuir kronolojia ne’ebé rekolla hosi PNTL katak kazu omesídiu ne’e akontese iha loron (16/3). Aktu ne’e mosu hahú ho agresaun fízika ne’ebé suspeitu rasik halo hasoru nia fen kaben ne’ebé ho kondisaun gravida to’o abortu.

Bainhira suspeitu nia fen kaben abortu tiha labarik ne’e, tuir informasaun ne’ebé polísia rekolla katak supeitu nia kaben mós hakotu kedan iis iha momentu ne’ebá.

Hafoin suspeitu ne’e halo tiha asaun violentu ne’e, suspeitu halai lakon no iha loron segunda ne’e (20/3) suspeitu rasik entrega aan ba PNTL.

“Supeitu agora entrega aan ba polisía no agora polísia detein ona iha sela detensaun Komandu PNTL Munisípiu Díli”, Superintendente Xefe Arnaldo Araujo, hateten ba jornalista sira iha nia kna’ar fatin Komandu Jerál PNTL Caicoli, segunda ne’e.

Nia dehan, polísia seidauk hatene loloos motivu hosi kazu ne’e no oras ne’e Komandu PNTL Díli halo hela investigasaun ba kazu ne’e hodi hatene loloos kauza hosi kazu ne’e rasik.

“Ami seidauk bele fó suspeitu ne’e nia identidade tanba Komandu Munisipiu Díli halo hela investigasaun ba suspeitu ne’e, ita hein katak iha tempu badak nia-laran ita bele hetan motivu loloos hosi kazu ne’e hodi bele enkamiña ba Ministériu Públiku”, nia informa.

Hatan kona-ba suspeitu nia fen kaben nia isin, Arnaldo hateten, agora daudaun iha hela mortuáriu Hospitál Nasionál Guidu Valadares (HNGV) atu submete ba prosesu autópsia.

“Supeitu-nia fen kaben nia isin mate agora daudaun iha hela mortuáriu Hospitál Nasionál Guidu Valadares hodi hein autópsia”, nia konklui.

Jornalista: Natalino Costa

Editór : Zezito Silva

 

iklan
iklan

Leave a Reply

iklan
error: Content is protected !!