Top

UEP prepara fó seguransa iha kampaña no eleisaun parlamentár

Komandante UEP Superintendente Xefe, Orlando Gomes. Imajen TATOLI/Francisco Sony

DILI, 20 marsu 2023 (TATOLI) – Komandante Unidade Espesiál Superintendente Xefe Orlando Gomes, hateten Unidade Espesiál Polísia (UEP) preparadu hodi fó seguransa durante períodu kampaña eleitorál to’o eleisaun parlamentár.

“Unidade Espesiál Polísia (UEP) prontu fó seguransa ba kampaña no eleisaun parlamentár no prontu atu atua kualker konflitu ne’ebé mak mosu. Tanba UEP ne’e treinadu hodi atende  saida de’it mak mosu”, Orlando Gomes hateten ba jornalista sira iha Komandu Jerál PNTL, Caicoli, segunda ne’e.

Nia dehan, membru UEP sira sei atua konflitu ka konfrontu ruma ne’ebé mak mosu perante kampaña no eleisaun UEP.

Nia haktuir, agora daudaun Komandu UEP fó ona treinamentu fiziku no tátiku ba membru Batalão Orden Públiku (BOP), Corpo Seguransa Pesoal (CSP) no Comando Operação Especial (COE) hodi prepra aan atu fó seguransa ba kampaña no eleisaun.

“Fulan ne’e ita hahú fo treinamentu ba membru sira hotu hosi BOP, CSF no COE atu sira mós prepara aan atu fó seguransa ba entidade sira tantu ba fó seguransa ba orden públiku liuliu ba fatin sira ne’ebé mak atu halo kampaña”, Orlando adianta.

Komandante ne’e hatutan, membru UEP sufisiente hodi fó apiu seguransa ba kampaña no eleisaun hosi nasionál to’o munisípiu sira.

“Klaru ita sei apoiu seguransa ba fatin votasaun, ha’u  hanoin membru UEP sufisiente atu fó apiu ba seguransa ba eventu festa demokrasia”, nia dehan.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!