iklan

NASIONÁL, DESPORTU, DILI, HEADLINE

Ponta Leste “dere kanek” Emmanuel 3-1

Ponta Leste “dere kanek” Emmanuel 3-1

Jogu Primeira Divizaun Liga Futeból Timor-Leste (LFTL) Ponta Leste F.C kontra Emmanuel F.C, iha Estádiu Munisípal Dili, tersa (21/03/2023). Rezultadu hosi joga ne'e Ponta Leste F.C manan Emmanuel F.C ho golu 3-1. Imajen Tatoli/Francisco Sony

DILI, 21 marsu 2023 (TATOLI) Armada AS Ponta Leste hanesan klube primeira divizaun Liga Futeból Timor-Leste (LFTL) susesu iha nia jornada da-haat hodi “dere” adversáriu Emmanuel FC ho rezultadu 3-1.

Kontra malu entre akipa rua hanesan jogu kontinuasaun LFTL époka 2022-2023 ne’ebé hala’o iha Estádiu Munisipál Dili, tersa loraik ne’e.

Hanesan baibain jogu komesa ekipa rua lansa kedan kontra no atake ba malu tuir tékniku no abilidade ekipa ida-idak nian atu buka hatama golu nune’e fó vitória ba sira nia ekipa.

Hosi kontra no atake ne’ebé ekipa rua lansa hatudu jogu ne’ebé kuaze hanesan maibé Ponta Leste domina liu bola.

Emmanuel halo kontra atake ho bola log ka bola aas maibé ekipa Ponta Leste hamate tutir tékniku ne’ebé Emmanuel lansa.

Ho nune’e, Emmanuel falla iha nia jogu Ponta Leste utiliza kedan oportunidade hodi lansa kontra no atake ne’ebé seriu iha menutu 21 jogadór Luis Ribeiro (7) prodúz ona golu primeiru hatur rezultadu ba 1-0.

Golu ne’e hanesan golu ikus iha menutu 45 parte primeiru nian tanba to’o jogu deskansa menutu 15 laiha tan golu ruma mak akontese Ponta Leste provijoriu lidera vitória.

Dolar ba segunda parte ekipa rua nafatin hala’o jogu ne’ebé bonito, Emmanuel esforsu makas liu hosi nia avansadu Edit Savio (10) lansa sutu barak ba rede Ponta Leste nian maibé sutu hirak ne’e hela de’it hanesan sutu tanba la kona iha alvu.

Ponta Leste mós la nonok de’it masi hatama ona golu nafatin esforsu nune’e bele aumenta tan golu bele fó vitória ba ekipa ne’e rasik.

Esforsu hirak Ponta Leste halo la hela de’it hanesan esforsu tanba iha menutu 64 jogadór Ricardo Bianco (6) simu bola aas ida hosi nia kolega utiliza kedan nia ulun hodi baku bola tama liu ba rede Ponta Leste nian nune’e muda rezultadu ba 2-0.

Golu ne’e halo vontade Ponta Leste nian sa’e tan de’it no jogadór sira semangat tebes iha kampo laran halo jogu Emmanuel nian falla total.

Ho jogu bonito ne’ebé Ponta Leste halo atrai tebes adeptus sira ne’ebé tur iha tribun leten Estádiu nian hakilar hodi fó kontente makas, enkuantu adeptus Emmanuel nian tur tane hasan hodi hateke de’it ho kalma bainhira mak sira nia ekipa atu halo golu.

Sorte aat monu tan ba Emmanuel iha menutu 73 tanba bola barullu makas iha lina oin Emmanuel nian jogadór Jaimito Soares (4) lansa kedan golu ida hodi hatur metin rezultadu ba 3-0.

Maske menutu sei hela uitoan de’it Emmanuel lakoi hela ho manolun sira nafatin esforsu nune’e bele fera mantolun ne’ebé iha hela sira nia kabas.

Esforsu hirak Emmanuel halo fó duni rezultadu di’ak ba sira hodi fera manotolun ne’ebé sei tomak tanba iha menutu 75 jogadór Angelito Tilman (8) konsege fura duni rede Ponta Leste nian muda rezultadu ba 3-1.

Golu Emmanuel nian ne’e mak hanesan golu ikus ba ekipa rua too menutu termina laiha tan golu ruma mak akontese vitória hela ba Ponta Leste no Emmanuel hela ho derrota.

Eskuad Ponta Leste:

Pablo de Jesus (1),Almerito da silva (13), Candido de Oliveira (77), Jaimitu Soares (4), Ricardo Bianco (6), João Halle (20), Jose Pereira (29), Olagar Xavier (18), Jacinto Soares (24), Ejivanio da Costa (11), Expedito da ConceiÇão (11).

Siplente:

Albino Ximenes (95), Luis Figo Ribeiro (7), Anizu Correia (14), Marito dos santos (9), Silveiro Grascia (27), Samuel Da Cruz (17), Isaac Toni (19), Revelino  Martins (22), Lazaro Ximenes (15), Francisco Costa (8).

Treinadór: Lourenco da Costa

Eskuad Emmanuel FC:

Carvarinho Fernandes (1), Alexandre Moreira (9), Amancio Araujo (18), Cristovão de Carvalho (29), Zenedine Lopes (6), Zeferino Nheu. (12), Sandro Quintão 14, Mario Quintão (11), Juvito Moniz (3), João Sousa. (22) no Edit Savio (10).

Suplente:

Fortunato Gomes (77), Afonso de Carvalho (2), Carlos Soares (23), Elroi Braz (15), Jonatas Pereira (7), Luis Gusmão (17), Nilton Carvalho (25), Orlando Belo (21), Vidal Correia (5), Vivaldo Magno (13) no Bernardino de Sena (4).

Treinadór: Emilio Ribeiro

Jogu ne’e dirije hosi árbitru prinsipál Francisco Pereira, juiz liña Antonio Carvalho, Paulo da Costa no árbitru rezerva Pedro Braga.

Jornalista:Hortencio Sancehez

Editór : Zezito Silva

iklan
iklan

Leave a Reply

iklan
error: Content is protected !!