Austrália prontu apoia asisténsia ba Timor-Leste bainhira mosu dezastre naturál

DILI, 22 marsu 2023 (TATOLI) – Vise-Ministru Interiór, Antonio Armindo, hamutuk ho Sekretáriu Estadu Protesaun Sivíl (SEPS), Joaquim José Gusmão dos Reis Martins, hala’o enkontru bilaterál ho Komisáriu Polísia Norte Teritóriu Austrália, Jamie Chalker ho komitiva hodi ko’alia kona-ba Programa Apoiu Austrália nian foka liu ba fó konsellu tékniku hodi harii kapasidade jestaun dezastre nasionál no hametin komunidade nia rejiliénsia ba impaktu dezastre nian iha Timor-Leste.

“Timor-Leste ho Austrália ita halo enkontru bilaterál ho delegasaun Governu Norte Teritóriu Austrália ne’ebé xefia hosi Komisáriu Polísia Jamie Chalker ho dosente sira hosi Universidade Charles Darwin hodi ko’alia kona-ba kooperasaun iha área sira ne’ebé mak kobre hosi Protesaun Sivil nian no-mós área Polísia Nasionál Timor-Leste (PNTL) nian”, SEPS Joaquim José Gusmão dos Reis Martins, dehan liuhosi komunikadu ne’ebé Agência TATOLI asesu, ohin.

Nia dehan, enkontru ne’e realiza tanba antes ne’e, Governu Timor-Leste liuhosi Ministra Negósiu Estranjeiru no Kooperasaun (MNEK), Adaljiza Magno no Ministra Xefe Norte Teritóriu Austrália, Natasha Fyles, asina ona akordu parseria estratéjika iha Parlamentu Darwin-Austrália no akrodu foun ne’e sei validu to’o tinan 2026.

“Ita-nia Primeiru-Ministru Taur Matan Ruak, iha fulan fevereiru ho komitiva halo ona vizita ba Darwin hodi asina akordu ida importante tebes ba Timor-Leste no Governu Norte Teritóriu hodi haree ba setór estratéjiku sira, hanesan komérsiu, negósiu, agrikultura, turizmu, petróleu no minerál inklui jestaun emerjénsia nian, ida ne’e hanesan atu atualiza fali MoU ne’ebé asina ona entre Governu Timor-Leste no Governu Norte Teritóriu Austrália”, Armindo dehan iha komunikadu ne’e.

Governante ne’e hatutan, sorumutu ida ne’e mós sai hanesan faze dahuluk atu tau hamutuk hanoin hodi haree atividade ne’ebé identifika atu faze tuir mai bele iha kooperasaun ida ne’ebé di’ak liután iha área emerjénsia nian tanba sira komprometidu ne’ebé mak bo’ot hodi bele halo kooperasaun ho Ministériu Interiór liuhosi Protesaun Sivíl.

Entretantu, Xefe delegasaun Governu Norte Teritóriu Austrália, Komisáriu Polísia Jamie Chalker, hateten kontinua apoia Timor-Leste atu aumenta ninia rejiliénsia ba dezastre iha futuru.

“Hosi parte ami nian, hatan ba emerjénsia la’os iha dezastre naturál de’it maibé iha area oioin hanesan mós seguransa ba bio diversidade no hanesan parseriu ne’ebé besik liu ami sente iha buat barak mak hanesan tanba tipu emerjénsia ne’ebé ami hasoru la ses mós hanesan Timor-Leste hasoru. Loron hirak liu ba ami mós hetan inundasaun makas nune’e ami tenke evakua komunidade hamutuk 600 resin ba fatin seguru no ha’u fiar situasaun ida ne’e refleta mós iha Timor-Leste”, Jamie Chalker dehan.

Jamie Chalker subliña, Austrália prontu atu fornese asisténsia emerjénsia hodi apoia resposta lokál ba dezastre sira hanesan fornesimentu ai-han no fornesimentu emerjénsia, apoiu lojístiku no pesoál sira.

Antes ne’e Guvernu Austrália mós fornese millaun 7.5 dolar Austrália nian, fundu ba Timor-Leste nia resposta ba inundasaun iha fulan-abril tinan 2021, inklui ba fornesimentu ai-han no asisténsia médika no-mos apoia kapasidade resposta umanitária no dezastre hosi Forsa Defeza Timor-Leste (F-FDTL) no PNTL.

Jornalista:Hortencio Sancehez

Editór : Zezito Silva