iklan

EKONOMIA, HEADLINE, LAUTÉM, MUNISÍPIU

Estrada suku Maina II difikulta transporta produtu ba merkadu

Estrada suku Maina II difikulta transporta produtu ba merkadu

Kondisaun estrada suku Maina iha zona altu Lalenu, postu admistrativu Lautém, munisípiu Lautém hetan estragu hodi difikulta movimentu transporte públiku. Imajen Agência TATOLI/Natalino Belo.

LAUTEM, 22 marsu 2023 (TATOLI) – Kondisaun estrada iha suku Maina II, postu admistrativu Lautém hetan estragu nune’e difikulta transporta produtu lokál ba merkadu.

Xefe suku Maina II, Marcelo Duarte Cristovão, esplika, estrada refere hetan estragu tanba konstrusaun dezde tempu Indonézia nian ne’ebé to’o agora seidauk iha reabilitasaun, maske autoridade komunitária sira hato’o ona proposta ba institusaun relevante.

“Ita triste, komunidade hakarak goza ukun-rasik aan ne’e, ita la husu barak maibé estrada mak importante nune’e fasilta movimentu komunidade atu transporta produtu ba merkadu,” Xefe suku Maina II informa ba Agência Tatoli iha sede suku, kuarta ne’e.

Estrada refere nu’udar asesu transporte iha zona altu Lalenu ne’ebé alende Maina I, sai mós dalan públiku ba suku tolu seluk hanesan suku Maina romeiru, Baduru no Serelau nu’udar baze ba FALINTIL iha tempu okupasaun Indonézia

Nune’e, autoridade zona altu Lalenu kontinua husu ba governu atu fó prioridade ba kondisaun estrada nune’e bele ajuda movimentasaun transporte, maske iha tinan-2021 autoridade suku haat hato’o ona proposta ba Ministériu Obra Públika (MOP).

“Iha-ne’e estrada mak sai problema dahuluk tanba ami suku haat utiliza estrada ne’e hodi asesu ba postu no munisípiu ne’ebé difikulta transportasaun produtu lokál ba merkadu,” Marcelo Cristovão akresenta.

Autoridade lokál kontinua tau esperansa ba governu atu tempu besik bele hadi’a lalais estrada iha área refere.

Estrada iha zona Lelunu ho distánsia kilómetru 11 ne’ebé daudaun ne’e risku ba movimentasaun transporte públiku no privadu liuliu iha tempu udan.

Suku Maina II komposta hosi aldeia lima hanesan Queduluru, Oirata, Kodo, Lereadu no Lere-ira, ho totál populasaun rihun rua-resin hosi totál uma-kain 542.

Notísia relevante: Aldeia rua iha suku Maina II seidauk asesu liña elétrika

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!