Top

Kazu Kulau arguidu sira submete ba interogatóriu dahuluk iha TDD

Tribunál Distritál Dili (TDD),halo prosesu interogatóriu dahuluk ba arguidu na’in ualu (8) ne’ebé envolve iha kazu omisídiu Kulau. Imajen Tatoli/ Natalino Costa

DILI, 22 marsu 2023 (TATOLI) – Tribunál Distritál Díli (TDD) prosesa interogatóriu dahuluk ba arguidu na’in ualu ne’ebé envolve iha kazu ómesidiu iha área Kulau.

Ministériu Públiku ne’ebé reprezenta hosi Prokuradór Claudino do Rosario iha prosesu Interogatóriu Dahuluk ne’e promove argidu sira ho krime arma branka ne’ebé previstu iha lei númeru 5/2017, krime ofensa integridade fízika previstu iha Kódigu Penál 145 no krime ómesidiu agravadu ne’ebé kosta iha artigu139 hosi Kódigu Penál Timor-Leste.

Hafoin Tribunál rona tiha deklasaun hosi arguidu sira no parte defeza. Juiza ne’ebé kaer prosesu Ana Paula Fonseca seidauk bele hatún despaixu liga ho arguidu nain ualu ne’ebé envolve kazu Kulau no deside adia prosesu interogatóriu dahuluk ne’e ba parte loraik tuku 14:00 hodi kontinua ba alegasaun molok Juiza Ana Paula Fonseca hatún despaixu ba kazu ne’e.

Tuir observasaun joranalista TATOLI iha terenu bainhira transporta arguidu na’in 8 hosi sela Komandu PNTL Munisipiu Díli hodi submete ba prosesu interogatóriu dahuluk iha TDD, hetan seguransa másimu hosi membru PNTL Komandu Munisípiu Díli.

Durante prosesu interogatóriu dahuluk ba arguidu nain ualu iha TDD, hetan akompañamentu hosi sira-nia família.

Kazu ómesidiu ne’e akontese iha  domingu (19/3)  tuku 21: 25  iha área Kulau Suku Becora, Postu Administrativu Cristo Rei, Munisipiu Díli mosu konfrontu ida iha uma kos ida iha fatin, to’o sona malu, nune’e iha insidente ne’e rezulta vítima ho inisiál  NdS (20) mate fatin no iha kalan ne’e kedan transporta kedan ba Hospitál  Nasionál Guido Valadares.

Iha konfrontu ne’e rezulta mós vítima nain rua ho insiál RdS (21) kanek grave no BBS  (35) hetan kanek kaman,  agora daudaun vitima sira ne’e, halo hela tratamentu iha Hospitál  Nasionál Guidu Valadares Díli.

Jornalista: Natalino da Costa

Editór : Zezito Silva

Publisidade

Leave a Reply

Latest Post

error: Content is protected !!