Dekretu-lei Jestaun Eskolár hein promulgasaun husi PR
DILI, 23 marsu 2023 (TATOLI) – Dekretu-lei Jestaun Eskolár ne’ebé aprezenta hosi Ministériu Edukasaun Juventude no Desportu (MEJD) hodi reforsa planu Ministériu nian atu kria Uniforme Nasionál ida ba estudante sira iha territóriu nasionál ne’e hein de’it Prezidente Repúblika halo promulgasaun.
Ministru Edukasaun Juventude no Desportu, Armindo Maia haktuir katak dekretu-lei kona-ba Jestaun eskolár ne’ebé sira submete ba Konsellu Ministru hetan ona aprovasaun. No, dekretu lei ne’e rasik haruka ona ba Xefe Estadu hodi hein promulgasaun.
Dekretu-lei ne’e sei reforsa programa MEJD nian atu implementa planu kriasaun uniforme nasionál ba estudante sira iha territóriu nasionál tanba hosi dekretu-lei ne’e maka sei sai baze ida atu fó dalan ba Ministériu hodi bele implementa ninia planu no programa sira.
“Ita halo ona preparasaun liuliu kona-ba modelu kór no motif ba uniforme nasionál ne’e. Ne’e duni, kuandu dekretu-lei ne’e promulga ona ita bele aselera ona prosesu ne’e,” governante ne’e informa ba jornalista sira iha Palásiu do Governu daudaun ne’e.
Membru ezekutivu ne’e relata katak tuir modelu kór no motif uniforme nasionál ne’ebé MEJD deside ne’e sei la sees hosi identidade Timor nian. Ministériu define ona sei uza identidade nasionál no identidade kulturál. Signifika uniforme ba estudante sira iha territóriu nasionál hahú hosi edukasaun Pré-Eskolár, ensinu báziku to’o ensinu sekundáriu jerál tékniku vokasionál sei uza farda no kór bandeira depois sei halai ho Tais.
Maibé tuir observasaun Agência Tatoli nian haree katak eskola barak iha Dili suku ona sira-nia farda rasik mezmu Ministériu hasai ona despaxu Ministeriál hodi bandu labele suku farda. Ho nune’e bainhira halo konfirmasaun ho Ministru Edukasaun Juventude no Desportu nia konsidera katak ida ne’e fallansu ida ne’ebé Ministériu enfrenta no ba eskola sira ne’ebé mak suku ona sira nia farda ba estudante sira Ministériu laiha razaun ida atu dehan labele.
“Antes ne’e ita hasai duni despaxu hodi bandu no hanoin katak prosesu ne’e bele lalais maibé to’o agora sei hein hela dekretu lei ne’e entaun ita mós konsidera labarik sira tenke iha duni uniforme ida atu nune’e eskola bele halo kontrolu,” nia dehan.
Enkuantu Diretór Jerál Edukasaun Ensinu (DGEE), Luis Manuel da Costa Fernandesm antes ne’e esplika katak uniforme ba estudante sira iha territóriu nasionál ne’e bainhira prodús ona sei iha diferensa hosi motif ka Tais ne’ebé uza hosi munisípiu ida ba munisípiu seluk ninia diferensa ne’e haree hosi Tais ne’e rasik.
“Uniforme nasionál ne’e modelu ida de’it maibé Tais ne’ebé sei suku ba uniforme ne’e maka sei uza tuir munisípiu ida-idak nian. Hosi Tais ne’e maka ita foin bele identifika katak estudante ne’e mai hosi munisípiu ida ne’e; ne’ebé sei la hanesan,” membru governu ne’e hatutan.
Uniforme nasionál ne’e sei suku tuir nível kada eskola, hosi edukasaun Pré-Eskolár iha territóriu nasionál modelu ida de’it, depois ensinu báziku iha territóriu nasionál mós modelu ida de’it no ensinu sekundáriu jerál mós hanesan de’it.
Notísia relevante:Liña ministeriál kria konseitu utiliza tais sai uniforme nasionál
Jornalista : Tomé Amado
Editór : Rafael Ximenes de A. Belo
