Empata ho Académica, Assalam lidera provizóriu tabela klasifikasaun
DILI, 23 marsu 2023 (TATOLI) – Ekipa jigante Assalam FC lidera tabela klasifikasaun provizóriu ho pontu ualu hafoin empata ho armada Académica FC 1-1.
Kontra malu entre ekipa rua hanesan kontinuasaun Liga Futeból Timor-Leste (LFTL) primeira divizaun ne’ebé hala’o iha Estádiu Munisipál Dili, kinta loraik ne’e.
Hanesan baibain ekipa rua tama ba kampu laran hodi kompete tenke lansa uluk kontra no atake ba malu tuir tékniku no abilidade ekipa ida-idak nian atu buka vitória ba sira nia ekipa.
Iha kontra no atake ne’e ekipa rua laiha forsa ne’ebé diferente no iha menutu 39 jogadór Assalam Martinho Belo lansa ona golu ba Académica hodi muda rezultadu ba 1-0.
Golu ne’e hanesan golu ikus ba ekipa rua iha menutu primeira parte nian tanba to’o menutu 45 termina laiha tan golu ruma mak akontese.
Semo ba segunda parte ekipa rua lansa kedan kontra no atake ba malu iha menutu 46 jogadór, Académica Damianus Putra responde kedan golu ida muda rezultadu nakfilak ba 1-1.
Hosi golu ne’e mak hanesan golu ikus ba ekipa rua tanba kontra no atake barak ekipa rua la prodúz tan golu to’o menutu 90 termina.
Hosi rezultadu ne’e ekipa rua obrigadu tenke fahe pontu ba malu ho hanesan Assalam pontu ida no Académica pontu ida.
Tabela klasifikasaun provizóriu primeira divizaun
Assalam lidera provizóriu tabela klasifikasaun ho pontu ualu, AD SLB laulara pontu hitu, Porto Taibessi FC ho pontu neen, Karketu Dili FC pontu neen diferente golu, Emmanuel FC ho pontu neen maibé diferente golu, Académica FC pontu lima, Ultramar ho pontu haat, Ponta Leste ho pontu haat diferente golu, Aitana FC tur iha linñ mean ka ikus liu ho pontu haat hanessn ekipa rua seluk maibé menus liu golu kompara ho ekipa rua seluk.
Jornalista: Hortencio Sanchez
Editór : Zezito Silva
