Golu rua hosi Gally oferese vitória ba Karketu
DILI, 22 marsu 2023 (TATOLI) – Ekipa jigante Kapitál Dili ho naran estimadu Karketu Dili FC susesu iha nia jornada da-haat bainhira kontribui golu rua hosi avansadu Paulo Gally lori ekipa ne’e manán Aitana FC ho eskore 3-1.
Jogu ba ekipa rua hanesan jogu kontinuasaun Liga Futeból Timor-Leste (LFTL) primeira divizaun ne’ebé hala’o iha Estádiu Munisipál Dili kuarta loraik ne’e.
Hanesan baibain jogu hahú ekipa rua lansa kedan kontra no atake ba malu tuir tékniku no abilidade ekipa idaidak nian tuir orientasaun treinadór nian.
Aitana halo jogu ho modelu bola aas ka bola long akompaña mós ho defensivu karik Karketu lansa kontra makas.
Enkuantu Karketu hala’o jogu ho másimu tebes hodi buka prodúz golu ne’ebé lais tanba iha jogu primeiru no segundu ekipa Kapital Dili ne’e derrota dala rua tutuir malu no okupa hela iha liña mean.
Ho esforsu Karketu nian ne’e la hela de’it hanesan esforsu tanba konsege fó duni rezultadu ne’ebé brillante liuhosi jogadór Paulo Gally (21) tanba iha menutu 3 bola barullu iha liña oin Aitana nian jogadór estrela Timor-Leste ne’e lansa kedan sutu ida ba rede Aitana bola tama liu ba laran rezulta duni golu dahuluk nune’e rezultadu nakfilak ba 1-0.
Hosi golu ne’e hasa’e liután espiritu jogadór Karketu nian hodi luta makas liután halo jogadór Aitana sira book aan araska iha kampo laran.
Ho vontade ne’ebé makas iha menutu 13 jogadór Gelvanio Alberto (10) lansa tan golu segundu, muda rezultadu ba 2-0, hosi golu ne’e halo adeptu Karketu nian hakilar makas iha tribun leten hodi fó gloria ba sira nia ekipa favóritu ne’ebé lidera ona jogu ne’e.
Maske reasaun kontente hosi adeptu Karketu halo adeptu Aitana nian tur nonok hodi asiste de’it jogu no laiha lian.
Hosi golu Gelvanio nian ne’e hanesan golu ikus ba ekipa rua iha menutu primeira parte tanba to’o menutu termina laiha tan golu ruma mak akontese no jogadór sira tenke deskansa menutu 15 nune’e hakur fali ba segunda parte.
Dolar ba segunda parte ekipa rua nafatin halo jogu ne’ebé bonitu, ekipa Aitana esforsu makas atu halo empata jogu ne’e maibé jogadór Karketu la fó valda atu ultrapasa tama liña oin Karketu nian.
Tensaun jogu komesa sae makas liu iha menutu 50 liu tanba jogadór sira halo kontrola bola ho másimu tebes iha kampo laran no bola barullu makas iha liña oin Karketu nian jogadór Zacarias Cabral (32) la antisipa didiak bola barullu ne’e nia rasik hatama golu ba sira nia rede rasik iha menutu 52 hodi muda rezultadu ba 2-1.
Hosi rezultadu autogolu ne’e halo jogadór Aitana sira nia prestasaun komesa brillante maibé prestasaun hirak ne’e hela de’it hanesan prestasaun tanba la prodúz tan golu ruma.
Biar nune’e Karketu nafatin esforsu maske lidera provizóriu jogu ho golu rua. Iha menutu 58 defeza Aitana halo falta hasoru jogadór Gelvanio iha liña oin Aitana nian árbitru deside fó falta no jogadór Gally mak sai ezekutadór to’o ikus nia ezekuta duni bola tama ba rede laran muda rezultadu ba 3-1.
Hosi golu Gally nian ne’e hanesan golu ikus ba ekipa rua to’o menutu termina vitória hela ba Karketu no derrota hela ba Aitana.
Eskuad Aitana FC:
Celestino da Costa, Emeliano Parada, Roberto Maia, Pascoal Ximenes, Danilo Alves, Miguel Araujo, Luis da Silva, Angelo Fernandes, Helder Valente, Herminho Moniz, Mamoudou Conde.
Suplente:
Rivaldo Martins, Babriel da Costa, Natalino Morais, António Moniz, Alexandre Nogueira, Benjamin Amaral, Rivaldo Correia, Willian Vong.
Treinadór: José Fonseca
Eskuad Karketu Dili FC:
Georgino da Silva, Domingos Ramos, Antonio Martins, Gelvado Alberto, Celsio Escurial, Pauulo Gally, Orcelio Novelito, Augusto da Costa, Zacarias Cabral, Mauricio Gonzales, Janneth Kamare.
Suplente:
Ricardo Nunes, Januario Fonseca, Antonio Provirio, Jorge Savas, Gaudencio Monteiro, Silvestre Gama, Natanael Reis, Jose Fernandes, Olegario Boavida.
Treinadór: Castelo Branco
Jogu ne’e dirije hosi árbitru prinsipál Eufrasio da Costa, juiz liña Filomeno da Silva, Ivo Moniz no árbitru rezerva Joanico Gama.
Jornalista: Hortencio Sanchez
Editór : Zezito Silva
