DILI, 23 marsu 2023 (TATOLI)– Ministériu Obra Públiku (MOP) liuhosi Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE,I.P) asina akordu ho Ministériu Administrasaun Estatál (MAE) hodi fasilita servisu Uma Naroman ba Povu (UNP) iha suku sira iha territóriu laran.
Ministru Obra Públiku, Abel Pires, hateten, objetivu MOP liuhosi IGEADE,I.P asina akordu ho MAE ne’e atu fasilita Governu halo reabilitasaun no manutensaun ba estrada sira ne’ebé ligasaun hosi kapitál munisípiu ba suku sira iha área rural hodi kompañia sira bele halo servisu ka konstrusaun ba Uma Naroman ba Povu.
Notisia relevante : PNDS distribui zinku UNP + B ba uma-kain 37 iha Uaitame
“Relasiona ho preokupasaun komunidade nian kona-ba programa Uma Naroman ba Povu iha suku sira la la’o kauza Estrada, mak ita asina ona akordu ho MAE atu apoiu servisu ba iha terrenu. Ne’ebé hein de’it servisu koordenasaun signifika akordu iha tiha ona no MAE hato’o lista ba IGEADE. Ho ida ne’e, ekipamentu sei tun terrenu halo reabilitasaun ka manutensaun ba estrada liga ba iha suku sira iha territóriu laran,” Abel Pires hateten, ba Agência Tatoli, iha Palásiu Governu,Dili kuarta.
Nia dehan, Governu sei halo esforsu makaas hadi’a dalan sira ba suku hodi fasilita komunidade halo konstrusaun ba Uma Naroman ba Povu ne’e tanba programa ida ne’ebé importante tebes ba Governu hodi apoiu komunidade.
“Ita sei apoiu tanba uma Naroman ba Povu ne’e projetu importante tebes ba Governu. Nune’e IGEADE rasik mós daudaun ne’e nia brigada sira iha munisípiu,” Abel dehan.
Jornalista : Arminda Fonseca
Editora : Armandina Moniz
