DILI, 24 marsu 2023 (TAYOLI)—Sekretária Estadu Ambiente (SEA) liuhosi Autoridade Nasional Designada bá Kombate Aleterasaun Klimátika, Institutu Públiku (AND,I.P) entrega ekipamentu sistema alerta sedu (EWS- Early Warning System) ba Diresaun Nasional Meteorolójia no Jeofízika (DNMG sigla portugés).
Prezidente AND,I.P, Pedro Godinho da Costa, hateten objetivu ekipamentu sistema alerta sedu ka EWS ne’ebé entrega ba DNMG ne’e oinsá apoiu di’ak liutan DNMG nia servisu ba sistema alerta sedu.
“Ekipamentu eletróniku ne’ebé ita entrega ne’e mak hanesan, komputadór, telefone no sira seluk ne’ebé bele apoiu operasianalizasaun ba iha servisu lais sira ne’ebé liga ba alerta sedu nian,” Pedro Godinho da Costa, hateten, iha salaun SEA, Mandarin, Dili, sesta ne’e.
Nia dehan, apoiu sira ne’ebé SEA halo ne’e hetan Fundu hosi Klimátika Verde, no AND,I.P hanesan, autoridade Governu nian iha SEA nia okos ne’ebé iha responsabilidade atu asegura projetu sira ne’ebé liga ba Fundu Klimátika Verde nian.
“Totál orsamentu ne’ebé sosa ba ekipamentu eletrónika ne’e kuaze $9.000 liu ne’ebe depende ba fundu ne’ebé alokadu ba ekipamentu sira ne’e,” nia hateten.
Iha fatin hanesan, Diretór DNMG, Terêncio Fernandes Moniz, hateten sira-nia parte kontente tanba hetan suporta hosi SEA.
“SEA suporta ami liuhosi Fundu Klimátiku Verde sosa ekipamentu eletróniku liuhosi projetu Sisteama Alerta Sedu ne’e mak hanesan, komputadór, telephone hitu, software antivirus no seluk tan, ida ne’e mak ami simu hosi SEA tuir proposta ne’ebé ami hato’o” nia dehan.
Ekipamentu ne’ebé ohin, DNMG simu ona ne’e, ba oin atu utliza no parte tékniku DNMG mak sei monta software sira ne’e hodi uza ba monitorizasaun iha terrenu.
“Tanba tempu ne’e sei monta automatic station sira ne’e iha munisípiu hotu. Ho ida ne’e, sei halo aplikasaun sira no, monta software ba laptop hodi nune’e ekipamentu sira ne’e monta hotu no sira bele koko kedas iha terrenu, no ba telefone ne’e, sei koko kona-ba ba previzasaun tempu nian,” nia dehan.
Jornalista : Arminda Fonseca
Editora : Armandina Moniz
