DILI, 24 marsu 2023 (TATOLI) – Diretór Servisu Saúde Aileu, Manuel de Jesus, dehan rekursu umanu sai problema iha Servisu Saúde Munisipál ida ne’e hodi fó tratamentu ba pasiente sira.
“Ami-nia médiku jerál durante ne’e hamutuk 28 maibé na’in13 mak husik Servisu Saúde Aileu hodi ba hala’o servisu iha Hospitál Nasionál Guido valadares, entaun ami agora problema ba rekursu umanu”, Manuel de Jesus dehan ba TATOLI via telephone, ohin.
Nia hateten, médiku jerál sira ne’e hala’o servisu iha HNGV hodi kapasita sira nia-aan no mós hasae sira nia espesialidade ba iha sira nia profisaun hanesan médiku espesialista.
“Mezmu ita rekursu menus maibé ita kontinua promove sira ba iha espesialidade atu bele fila fali mai iha Aileu, karik aban bainrua sai ospitál munisipál, sira mak bele jere ida ne’e”, nia adianta.
Nia akresenta, Servisu Saúde Munisípiu Aileu halo ona proposta ba MS hodi haree ba asuntu rekursu umanu, atu bele koloka fila fali médiku foun hodi apoiu servisu atendimentu iha Aileu.
“Ita mós la nonok maibé ita halo ona proposta ba MS hodi haree ba asuntu ida ne’e hodi prepara médiku foun hodi mai halo atendimentu iha ne’e”, nia subliña.
Profisionál Saúde iha Aileu durante ne’e hamutuk 104 mak halo atendimentu ba Postu Saúde 13 no Sentru Saúde haat.
Munisípiu Aileu iha Postu Saúde 13 mak Postu Saúde Faturasa, Postu Saúde Maumeta, Postu Saúde Tulatakeu, Postu Saúde Fatisi, Postu Saúde Moumeta, Postu Saúde Madabenu, Postu Saúde Fahisoi berleu, Postu Saúde Seloi Kraik, Postu Saúde Mantane, Postu Saúde Saburia, Postu Saúde Maurusa, Postu Saúde Suku Liurai no Postu Saúde Oholau.
Nune’e mós, iha Sentru saúde haat hanesan Sentru Saúde Remixiu, Sentru Saúde Lequidoe, Sentru Saúde Laulara, no Sentru Saúde Aileu villa.
Jornalista : Felicidade Ximenes
Editór : Zezito Silva
