Top

Indísiu krime laiha MP deside arkiva parsiál kazu Padre Abito

Matebian Padre Abito José Brites Casimiro.Imajen/espesiál

DILI, 27 marsu 2023 (TATOLI) – Prokuradór Jerál Repúblika (PGR), Alfonso Lopez, hateten Ministériu Públiku liuhosi Prokuradór Titulár finaliza ona prosesu investigasaun ba kazu Amo Abito nia mate, maibé rezultadu investigasaun, MP deside arkiva ona ho parsiál tanba la hetan indísiu krime ruma hosi kazu ne’e.

“Kazu ne’e remata ona, ita-nia Prokuradór Titulár arkiva ona kazu ne’e”, Alfonso Lopez hateten ba jornalista sira bainhira partisipa serimónia aniversáriu ezisténsia PNTL ba dala-23 tinan ne’e iha  edifisiu Unidade Espesiál Polísia (UEP) Caicoli, segunda ohin.

Nia dehan, desizaun Prokuradór Titulár la’os arkiva totál kazu Amo Abito nia mate, maibé Prokuradór Titulár só deside halo arkiva parasiál, tanba períodu investigasaun MP liuhosi Prokuradór Titulár halo la iha indísiu krime ruma katak kazu Amo Abito ne’e ema mak oho.

“Kuandu kazu ne’e Prokuradór Titulár deside halo arkivu parsiál tanba evidénsia la forte no tanba provizóriu durante prosesu investigasaun ne’ebé MP halo durante fulan hirak nia-laran, liuhosi deklasaun ne’ebé arrola hosi testamuña hotu, mai laiha indísiu krime ruma ne’ebé ita bele akuza katak kazu ne’e krime, entaun kazu ne’e ita taka ona ho parsiál no Amo Abito nia mate ne’e mate normál ka bele dehan mate tanba asidente”, nia dehan.

Alfonso Lopez esplika maske kazu ne’e arkiva ona ho parsialmente, maibé la taka dalan hodi loke fila fali prosesu kuandu hetan evidénsia foun ruma.

“Ha’u dehan katak kazu ita la arkiva totálmente maibé ita arkiva de’it ho parsiál tanba evidénsia mak la foti katak iha altura ne’eba matebian mate laiha ema ida mak haree ho matan”, nia informa.

“Maibé mós la taka dalan ba Ministériu Públiku sei bele inisia fali prosesu foun katak bele loke fali investigasaun ba kazu ne’e, kuandu iha prova foun ruma ka iha indísiu foun ruma ne’ebé ema balun aprezenta mai iha Ministériu Públiku”, nia hatutan.

Jornalisa: Natalino da Costa

Editór : Zezito Silva

Publisidade

Leave a Reply

Latest Post

error: Content is protected !!