Treinadór Boxe lamenta ho alimentasaun no kondisaun fatin ba atleta SEA Games
DILI, 27 marsu 2023 (TATOLI) – Treinadór prinsipál selesaun Boxe Timor-Leste Abilio Orlando dos Santos, lamenta ho alimentasaun no fatin ba atleta selesaun nasionál hirak ne’ebé prepara atu ba SEA Games tinan ne’e, tanba fatin ladún iha kondisaun ne’ebé di’ak.
“Atu hasa’e prestasaun atleta sira nian, primeiru mak alimentasaun, tuir fali mak hela fatin, tanba agora fatin ne’ebé atleta sira hela ba ne’e iha kajerna Polísia Militár nian, ida ne’e di’ak maibé laiha ema ida kontrola no atleta sira barullu mak barak, seluk fali mak hahan ba atleta sira ladún di’ak liuliu mak han fali ayam potong, kankun no mostarda de’it, oinsa atleta sira atu iha fíziku ne’ebé di’ak”, Abilio dehan ba Agência TATOLI, iha Farol Dili, ohin.
Ho difikuldade hirak ne’e, treinadór hato’o ona ba ofisiál no Federasaun Boxe Amadora Timor-Leste (FBATL) hato’o ona ba Konfederasaun Desportiva Timor-Leste (CDTL-sigla portugés) maibé seidauk rezolve to’o ohin loron.
Tanba ne’e, nia husu ba CDTL katak tenke hadia situasaun ne’e, la hadia mak atleta sira ba kompete iha eventu internasionál ne’ebé sei la fó rezultadu di’ak ba Timor-Leste.
“Hahan ba atleta sira, kada federasaun la hanesan, ha’u ko’alia liubá Federasaun Boxe nian, tanba Boxita sira nia hahan la hanesan ho federasaun sira seluk, ami-nia menu hato’o ba CDTL sira dehan ne’e osan bo’ot liu maibé hanoin katak osan ne’ebé Governu fó ba atleta sira kada federasaun ne’e sufisiente ona, ita mak la halo jestaun ho di’ak, maibé CDTL la halo ida ne’e”, nia afirma.
Abilio dehan, kada loron atleta sira hela iha kajerna PM nian, ema ida haan hamutuk $18, 75 sentavus, maibé realidade hahan ne’ebé atleta sira haan la tuir osan ne’ebé iha.
Iha parte seluk, nia kestiona mós kona-ba ekipamentu ba atleta sira mós ladún di’ak liuliu hanesan sapatu no roupa ne’ebé CDTL haruka empreza oferese ba atleta sira agora daudaun, balun aat ona.
“Atleta sira-nia sapatu no kalsa ne’ebé mak CDTL haruka, empreza fahe ba atleta sira ne’e, ha’u nia atleta Delio nia sapatu nakles tia ona ho kalsa, ida ne’e mak ami sente la satisfaz, Governu fó osan ita tenke ba hola buat ne’ebé ho kualidade la’os ba hola fali sasan ne’ebé aat lalais ne’e”, nia revela.
Rekorda fali katak orsamentu ne’ebé antes ne’e Sekretáriu Estadu Juventude no Desportu (SEJD) aloka ba CDTL hodi halo preparasaun ba atleta modalidade hitu ne’ebé atu ba kompete iha SEA Games ne’e hamutuk rihun $82.
“Durante treinamentu, hahú hosi fíziku, tékniku no tátiku, iha tékniku ita sei haree ba power, spit no pukulan ka tuku sira tenke kona iha alvu ka lae”, nia esplika.
Dadaun ne’e modalidade ne’ebé hela iha kajerna PM mak Boxe, Karate-do, Taekwondo, Siklizmu, enkuantu futeból, Federasaun Futeból Timor-Leste (FFTL) mak prepara rasik iha sira nia fatin no Atletizmu prepara iha sira-nia fatin Gleno Munisípiu Ermera.
Maske hasoru dezafiu barak maibé FBATL nafatin buka alternativu hodi asegura atleta sira atu bele iha prestasaun ne’ebé di’ak.
Ho nune’e, Boxista sira preparadu atu ba kompete iha jogu ne’ebé sei realiza fulan maiu mai ne’e iha Kamboja.
Boxista selesaun nasionál dadaun ne’e hamutuk na’in lima mak Elidio da Conseição sei kompete iha 51kg, Edegar Quintão sei kompete iha 54kg, Eligio Gayo sei kompete iha 60kg, Alexandre Freitas sei kompete iha 63kg no Delio Mouzinho sei kompete iha 71kg.
Jornalista:Hortencio Sancehez
Editór : Zezito Silva
