Top

PNTL hahú identifika fatin risku ba konflitu hodi asegura pás-estabilidade iha ElPar

Komandante-Jerál PNTL, Henrique da Costa, akompaña hosi Segundu Komandante, Pedro Belo, hala'o primeiru enkontru ho membru PNTL sira, iha Sentru Formasaun Polísia Comor Dili, tersa (28/03). Imajen Tatoli/Francisco Sony

DILI, 28 marsu 2023 (TATOLI)— Komandante Jerál Polísia Nasionál Timor-Leste (PNTL) Komisáriu Jerál Polísia Herique da Costa, relata fó ona orienta ba Komandante Munisípiu sira no Servisu Informasaun Polísia (SIP) hodi hahú identifika fatin sira ne’ebé sai risku ba konflitu iha territóriu nasionál, nune’e bele halo prevensaun hodi garante pás no estabilidade durante atividade kampaña no eleisaun parlamentár.

“Fatin poténsia ba risku konflitu ne’e presiza identifika nune’e Komandu PNTL bele trasa planu operasaun tuir ida ne’e atubele halo prevensaun  durante kampaña no eleisaun parlamentár”, Komisáriu Herique da Costa hateten bainhira hahú sorumutu dahuluk ho ofisiál Superiór sira PNTL nian, iha Sentru Formasaun Polísia (CFP, sigla portugés), Comoro, tersa ne’e.

Iha tempu badak, Komandante Jerál ne’e dehan sei fó sai planu operasaun ba iha Komandante munisipiu sira, komandante unidade sira, atubele halo tuir hodi bele fó seguransa ne’ebé di’ak durante kampaña no eleisaun parlamentár.

“Kona-bá fatin no kolokasaun efetivu ne’e parte operasaun mak sei hatene no sira mak sei koloka membru hira no koloka membru hira bá munisipiu sira, nune’e ema efetivu hira ha’u labele fó sai,” nia afirma.

Biban ne’e, responsavél PNTL ne’e fó orientasaun ba Ofisiál no Superiór PNTL sira hotu atu apoia programa prioridade lima ne’ebé Komandu Jerál PNTL no Segundu Komandante Jerál trasa ona durante mandatu tinan tolu hodi bele dezenvolve institusaun PNTL ho di’ak liután.

Jornalista: Natalino Costa

Editór   : Florencio Miranda Ximenes

Publisidade

Leave a Reply

Latest Post

error: Content is protected !!