CNC fó formasaun ba manorin kaer dixiplina istória
DILI, 29 marsu 2023 (TATOLI)–Centro Nacional Chega (CNC) kontinua loke oportunidade fó formasaun ba manorin sira-ne’ebé kaer dixiplina istória tanba konsidera profesór barak seidauk bele hanorin matéria istória ba alunu sira iha sela-de-aula ho di’ak.
Diretór ezekutivu Centro Nacional Chega (CNC), Hugo Maria Fernandes, konsidera formasaun ne’e importante tebes ba manorin sira-ne’ebé mak durante ne’e hanorin istória ba alunu sira, tanba estudante ida bainhira atu hatene istória ida ho didi’ak manorin sira tenke prepara an liután.
“Manorin ida atu hanorin istória ida di’ak ba alunu sira labele iha aula laran de’it. Manorin ne’e tenke iha kreatividade atu lori estudante sira ba vizita fatin istóriku sira, depois lori ema ruma ba konta istória ba alunu sira iha aula laran,” Hugo Maria Fernandes hateten ba jornalista sira iha aula CNC, Antigu Komarka, Balide, kuarta ne’e.
Maibé, nia dehan, realidade hatudu profesór kuaze menus hosi rihun 10 mak seidauk hanorin istória ho di’ak no kompletu ba alunu sira, tanba problema laiha matéria didátika (livru) ne’ebé atu fasilita manorin sira ho adekuadu, no profesór sira lahetan koñesimentu di’ak tanba sira seidauk hetan formasaun ida adekuadu kona-ba realidade istória rai ida-ne’e nian.
Ho nune’e, liuhosi formasaun ne’ebé CNC, MEJD no INFORDEPE realiza ba manorin sira durante loron tolu ne’e atu kapasita sira no hasa’e sira-nia koñesimentu kona-ba istória sira, depois sira bele fahe tutan fali ba estudante sira iha aula laran, atu nune’e sira bele konta istória ida-ne’e ho loloos tuir duni saida mak hakerek ona iha livru sira ne’ebé CNC prodús ona.
Hafoin ramata tiha formasaun, formadór sei lori sira ba halo vizita iha fatin istóriku sira atu tulun manorin sira oinsá bele utiliza tempu ho didi’ak hodi intende ho espasu sira-ne’ebé sira haree, atu nune’e sira bele haktuir fali istória sira-ne’e ba alunu sira.
Sira mós sei hetan livru lubuk ida-ne’ebé CNC prodús ona, depois formasaun loron tolu ramata no livru sira-ne’e sei distribui ba profesór sira atu lori ba hodi utiliza hanorin fali estudante sira iha eskola taba livru sira-ne’e hakerek kona-ba realidade istória rai ida-ne’e nian.
“Livru ne’ebé ita hakerek no prodús ne’e kona-ba livru boot relatóriu Chega! Nian no livriñu ki’ik sira. Depois livru sira iha versaun populár, inklui video sira,” nia dehan.
Reprezentante INFORDEPE, Diretór Formasaun, Longuinhos da Silva, hateten formasaun ba profesór kaer dixiplina istória ne’e realiza ona ba daruak, tanba primeiru halo ona ba profesór na’in-108 no segunda faze realiza tan ba profesór na’in-50.
Maibé, Longuinhos esklarese katak nia seidauk garante profesór hamutuk rihun 10-resin iha territóriu nasionál ne’e hatene hotu ona istória Timor nian ho di’ak.
“Ita hakarak profesór hotu-hotu tenke hatene istória tanba atu hatene istória la limite no depende ba ema-nia nivel no títulu nu’udar rai-na’in, no ema timoroan tenke hatene duni istória. Maibé oportunidade ida agora ne’e sei fó uluk ba manorin sira-ne’ebé mak hanorin istória,” nia dehan.
Entretantu, Ministériu Edukasaun louva esforsu tomak ne’ebé CNC halo ona hodi kontinua realiza formasaun ba profesór sira no mós apoiu distribuisaun livru istória lubuk ida ona ba profesór sira iha territóriu nasionál.
Jornalista : Tomé Amado
Editór : Cancio Ximenes
