DNER sei rekruta konsultan-asesór elabora manuál ekivalénsia nivel ensinu sekundária
DILI, 29 marsu 2023 (TATOLI)–Diretór Nasionál Ensinu Rekorrente, Quintão da Costa Massa, hateten DNER iha tinan ne’e sei rekruta konslutan na’in-rua hosi tékniku pedagojia kurríkulu no jurídiku kurríkulu, inklui asesór ida atu elabora manuál ekivalénsia ba nivel ensinu sekundária.
“DNER planeia ona 2023-2024 ne’e sei kria programa nasionál ekivalénsia nivel sekundária nian ne’ebé sei hamutuk ho xefe departamentu tolu hanesan xefe departamentu administrasaun no jestaun, xefe departamentu programa no xefe departamentu asesu kualidade hamutuk ho ekipa tékniku ida, DNER prepara hela kondisaun balun atu halo rekrutamentu ba konsultan tékniku pedagojia no kurríkulu ida konsultan jurídiku kurríkulu ida inklui asesór ida,” nia hateten ba Agência Tatoli iha nia kna’ar, Vila Verde, kuarta ne’e.
Prosesu rekrutamentu ba konsultan no asesór ne’e atu realiza atividade kona-ba prosesu rezumu ba matéria giaun ba profesór no manuál ba estudante sira.
Servisu sira-ne’e sei prepara hosi tékniku kurríkulu sira hosi Munisípiu 13, depois mak kada munisípiu sei delega ema ida no ekipa tékniku ida atu hamutuk ho konsulta no asesór sira hodi elabora manuál ida ba ekivalénsia ensinu sekundária.
Tuir nia, kria programa nasionál ekivalénsia nivel sekundária ne’e ho intensaun atu tau atensaun ba estudante sira-ne’ebé mak la konsege akaba sira-nia estudu iha nivel ensinu sekundária ka drop out (DO).
Tanba, nia dehan, asuntu drop out ne’e sai problema ida importante tebes ba dirasaun, kada tinan kuaze joven barak mak husik sira-nia eskola tanba problema kaben sedu, ekonomia la sufisiente inklui involve iha grupu arte marsiál, nune’e halo sira labele kontinua sira-nia estudu to’o balu sai idade avansadu labele fila-fali ba edukasaun formál.
Dirasaun Nasional Ensinu Rekorrente hakarak aselera prosesu kona-ba elaborasaun manuál ba nivel ensinu sekundária nian atu fó biban ba estudante sira ho idade avansadu sira bele asesu ba edukasaun nau formal nivel ensinu sekundáriu, nune’e sira bele hetan diploma ruma hodi tama iha kampu de traballu sira.
“Tinan ida-ne’e ita fó tau atensaun makaas ba asuntu drop out nivel ensinu sekundária ne’ebé kada tinan númeru sempre aumenta. Ita hakarak antesipa estudante drop out nivel sekundáriu sira ne’e, atu bele asesu ba merkadu traballu,” nia dehan.
Bainhira estudante sira-ne’e asesu ona ba edukasaun non formál nivel ensinu sekundária, dirasaun mós sei atribui ba sira dokumentu ruma liu-hosi diploma sekundária no mós iha área edukasaun non formál ba formasaun profisionál atu atribui mós sertifikadu ruma relevante ho skill ne’ebé sira iha tuir programa ne’ebé sira hili hosi abilidade da vida.
Entretantu, elaborasaun manuál ba ensinu sekundária ne’e atu halo adaptasaun inklui halo mós redusaun ba kargu oráriu sira, katak prosesu ensinu aprendizajen ba edukasaun non formál sei diferensa ho edukasaun formál.
Tanba, tuir nia, ema sira-ne’ebé atu tama iha eskola ekivalénsia nivel sekundária ne’e balun sai ona aman ka inan, entaun sira-nia prosesu ensinu aprendizajen la hanesan ona ho eskola formál sira.
Entretantu, orsamentu DNER nian iha tinan ne’e hamutuk $400-resin maibé to’o agora dirasaun seidauk define atu tau hira ba prosesu tomak kona-ba planu no programa elaborasaun manuál ensinu rekorrente nian.
Iha tinan kotuk, DNER konsege prevee ona $455.714 atu prepara elaborasaun kurríkulu nivel sekundáriu iha programa ekivalénsia nian tanba mosu kalamidade sira la konsege realiza.
Jornalista : Tomé Amado
Editór : Cancio Ximenes
