DILI, 29 marsu 2023 (TATOLI) – Diretór tékniku Federasaun Futeból Timor-Leste (FFTL), Gaspar Quintão relata, preparativu selesaun nasionál U-23 ba SEA Games daudaun ne’e tama ona ba faze tekniku no tatiku.
“Ita-nia preparativu ba SEA Games la’o masimu hela. Agora dadaun tama ona iha faze tékniku no tatiku nian oinsá atu bele ba kompete ho di’ak. Ita iha ambisaun makaas atu hatudu jogu ne’ebé di’ak. Ha’u durante ne’e akompaña hela sira-nia treinamentu treinadór ne’e fó matéria mesak di’ak ba jogadór sira liu-liu tékniku no tatika jogu nian,” Diretór Gaspar Quintão ba Agência TATOLI iha edifisiu FFTL Dili, kuarta ne’e.
Iha semana tolu ba kotuk treinadór prinsipál U-23 Park Soon Tae hosi Korea Súl halo ona selesaun ba jogadór hamutuk na’in 26 mak fiksu ona atu ba kompete iha SEA Games tinan ne’e hala’o iha nasaun Kamboja.
Antes atu ba Kamboja FFTL mós iha ona planu atu lori jogadór na’in 26 ho treinadór atu ba halo training camp iha nasaun Tailándia no halo lai jogu try out ho klube sira iha Tailándia hodi koko jogadór sira-nia kapasidade hafoin ba kompete iha eventu rejionál ne’e.
Maske halo ona selesaun ba jogadór hamutuk na’in 26 maibé treinadór Korea ne’e nafatin halo observasaun iha jogu Liga Futeból Timor-Leste ne’ebé daudaun ne’e la’o hela atu buka jogadór ne’ebé di’ak bele hatama tan iha selesaun nasionál hodi substitui jogadór sira ne’ebé ladun iha prestasaun di’ak.
Treinamentu ba selesaun nasionál daudaun ne’e hala’o iha kampu FFTL Dili hosi segunda to’o sesta iha oras dader to’o remata.
Jornalista :Hortencio Sanchez
Editór : Rafael Ximenes de A. Belo
