DILI, 30 marsu 2023 (TATOLI) – Prezidente Repúblika, José Ramos Horta, hamutuk ho parseiru Korpu ba Pás fó pose ba Voluntáriu foun na’in-17 hosi Estadu Unidu Amérika (EUA) hodi marka Voluntáriu sira ne’ebé fila mai hodi hala’o servisu iha Timor-Leste durante tinan tolu.
“Ha’u kontente servisu hamutuk ho Korpu ba Pás hosi Estadu Unidu, voluntáriu sira maioria joven sira la’ós mai iha Timor-Leste de’it maibé kuaze ba iha rai hotu iha mundu hodi ajuda kona-ba agrikultura, fó formasaun lian inglés, jestaun ba nasaun hotu,” Xefe Estadu iha Embaxada Amérika Dili, kinta ne’e.
Nia dehan, joven voluntáriu hirak ne’e sei servisu oinsa fó formasaun lian inglés ba timoroan hirak ne’ebé hakarak aprende no dezenvolvimentu komunitáriu.
“Ha’u husu ba komunidade sira ne’ebé mak sei simu ema sira ne’e favór tau-matan ba sira, sira mai hosi dook laiha interrese seluk, maibé sira responde ba pedidu hosi Governu Timor-Leste no Prezidente Repúblika atu mai servisu voluntariu iha komunidade sira,” ema númeru ida iha Timor-Leste ne’e husu.
Iha okaziaun ne’e U.S. Chargé d’Affaires, Tom Daley iha ninia diskursu hateten, joven voluntáriu hirak ne’e sei servisu ho voluntáriu hamutuk ho komunidade timoroan-sira.
“Voluntáriu Korpu ba Pás reprezenta Amerikanu sira-nia espiritu di’ak, jenerosidade, servisu, no kompromisu atu sai hanesan forsa ida ba ki’ak sira iha mundu,” nia dehan.
Hahú tinan 2002, EUA orgullu halo ona parseria ho Timor-Leste atu Korpu ba Pás ninia Voluntáriu sira atu apoia dezenvolvimentu ba Komunidade timoroan sira.
“Sira-nia servisu reflete ami-nia meta atu investe iha timoroan sira hodi nune’e sira bele harii nasaun ida ne’ebé saudável, seguru no prosperiu liután,” nia rekoñese.
Durante iha Timor-Leste Voluntáriu sira sei servi iha Munisipiu sira hanesan, Bobonaru, Liquiça, Ermera, no Manatuto, iha ne’ebá sira sei tulun edukasaun Inglés no Dezenvolvimentu Ekonómiku Komunitáriu.
Voluntáriu sira-nia programa formasaun durante semana sanulu, ne’ebé inklui lian tetun no kursu imersaun kulturál, dezenvolvimentu abilidade tékniku no formasaun ba saúde no seguransa.
Formadór na’in ualu sei tulun edukasaun língua Inglés iha eskola sekundária sira no Voluntáriu nain sia sei promove Dezenvolvimentu Ekonómiku Komunitáriu hamutuk ho komunidade no grupu juventude sira, sentru treinamentu hosi Governu no ONG lokal sira.
Iha ámbitu tomada pose, Voluntáriu sira jura atu kaer-metin nafatin valór no prinsípiu sira hosi Korpu ba Pás no servisu maka’as atu bele hadi’a timoroan sira-nia moris.
Hafoin serimónia ida-ne’e, imediatamente Voluntáriu sira sei viajen ba sira-nia sítiu no muda ba sira-nia família ospedia sira.
Korpu ba Pás Timor-Leste iha istória naruk kona-ba susesu parseria ho Komunidade timoroan ho voluntáriu sira ne’ebé mai uluk iha nasaun ne’e iha tinan 2002.
Hahú hosi ne’ebá, voluntáriu liu na’in-200 mak servi ona iha Timor-Leste, halo projetu sira ne’ebé fo ona impaktu moris ba sira ne’ebé Voluntáriu sira servi.
Ho aumenta hosi Voluntáriu foun sira ne’e, Korpu ba Pás kontinua ninia kompromisu atu apoia timoroan sira no haforsa lasu entre Amerikanu no timoroan sira.
Grupu Voluntáriu Korpu ba Pás balun sei mai tan Timor-Leste iha outubru tinan ne’e.
Notísia relevante:
Jornalista : Hortencio Sanchez
Editór : Rafael Ximenes de A. Belo