Top

UPM husu peskadór kuidadu-aan bainhira halo atividade peska iha tasi 

Peskador sira rona hela esplika iha oportunidade Worshop ho tema kuidadu no fó importansia ba seguransa da vida bainhira halo viajen iha tasi-laran ne’ebé iha UPM Seional Díli, kinta ne’e. Foto Natalino Costa.

DILI, 30 marsu 2023 (TATOLI)– Komandante Unidade Polísia Maritima (UPM), Superintendente Eugénio Pereira, husu ba peskadór tenke kuidadu aan bainhira atu halo atividade peska iha tasi-laran.

“Husu ba maluk peskadór sira ne’ebé iha ne’e, atu ita-bo’ot sira kuidadu aan, bainhira atu halo atividade peska iha tasi-laran,” hateten Komandante Eugénio Pereira iha intervensaun bainhira partisipa worshop ho peskadór sira ho tema kuidadu no fó importansia ba seguransa vida bainhira halo viajen iha tasi-laran iha edifisiu UPM Seional Díli, kinta ne’e.

Superintendente ne’e enkoraja ba peskadór sira tanba dala barak akontese asidente iha tasi-laran tan de’it falta kuidadu liuliu la konsiensia no hahalok natureza.

“Ita tenke tau importansia ba ita-nia seguransa vida iha tasi laran. Kuandu maluk sira atu peska tenke haree kondisaun ró no haree mós ba klima tasi la permite ita labele ba se permite ita bele halo atividade,” Superintendente ne’e fó hanoin.

Iha fatin hanesan, Diretór Nasionál Inspesaun Peska iha MAP, Lourenço dos Reis Amaral,  fó hanoin ba iha peskadór sira atu labele utiliza ró peska tula fali sasan todan.

“Husu ba  ita bo’ot sira peskadór sira labele uza ró peska tula fali sasan todan, tanba ró peska ne’e normalmente uza de’it ba peska,” Nia fó-hanoin.

Atu evita asidente iha tasi, mak kada peskadór tenke tau iha konsiensia hodi deside sha oras mak fila ba iha rai maran tanba presiza asegura seguransa vida.

Diretór ne’e mós fó hanoin ba peskadór  munisipiu Ataúro no Ataúro-oan sira atu viajen tenke haree ba klima tasi nian, nune’e durante viajen tenke la’o di’ak.

“Ita lakohi asidente iha tasi akontese hanesan iha tinan kotuk akontese tán, ne’ebé peskadór balun lakon vida, atu prevene ida mak husu atu ita hotu tenke iha konsiensia karik viajen tenke haree ba klima tasi, kuandu la permite lalika halo viajen,” Nia afirma.

Entretantu, Metrolojista hosi Diresaun Nasionál  Meterojia no Geofizika, iha MTK, Natavidade Rodrigues, husu mós ba  peskadór no komunidade Ataúro atu akompana klima hodi bele asegura seguransa vida.

“Daudaun ita iha tempu udan no ami sempre alerta ba públiku situasaun klimátiku hosi munisipiu ba munisipiu seluk inklui klima iha tasi atu ita seguru iha ita-nia viajen. Nune’e husu peskador tenke akompana”, nia afirma. .

Jornalista: Natalino Costa  

Editór       : Florencio Miranda Ximenes

Publisidade

Leave a Reply

Latest Post

error: Content is protected !!