Angola komprometidu instala embaxada iha Timor-Leste
DILI, 31 marsu 2023 (TATOLI) – Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hasoru malu ho nia ómologu Ministru Negósiu Estranjeiru Angola, Tete Antonio hodi ko’alia kona-ba Estadu Angola bele estabelese embaxada iha Timor-Leste.
“Angola atu estabelese embaixada iha Timor-Leste, hodi bele hametin liután relasaun no kooperasaun entre nasaun rua no Angola presiza tebes atu iha reprezentasaun iha Estadu membru CPLP hotu”, Ministra Magno dehan liuhosi komunikadu ne’ebé TATOLI asesu, ohin.
Hatan ba pedidu hosi Ministériu Negósiu Estranjeiru Angola, Ministra Magno espresa Timor-Leste apoiu no nakloke ba Angola nia misaun diplomata.
Governante rai-rua ne’e hasoru malu iha ámbitu reuniaun extraordináriu Konsellu Ministru CPLP nian ba dala XVI.
Iha kontestu ne’e, Ministru Tete António hahú hanoin no subliña Timor-Leste nia prezensa no partisipasaun iha enkontru extraordináriu Konsellu Ministru CPLP nian.
Jornalista: Hortencio Sanchez
Editór : Zezito Silva
